Дар натиҷаи эътирозҳои хиёбонӣ дар Непал ба хотири баста шудани шабакаҳои иҷтимоӣ 19 ҷавон кушта шуд.
Пас аз ба ҳалокат расидани ҷавонони муътариз, ҳукумати Непал рӯзи 9 сентябр эълон намуд, ки басташавии шабакаҳои иҷимоӣ бекор карда мешавад. Ҳамзамон, комиссияи махсус барои таҳқиқи сабабҳои ҳодиса ва пешниҳод намудани чораҳои ислоҳӣ таъсис дода шудааст.
Ин ақабнишинии ҳукумати Непал дарҳоле аст, ки рӯзи 4 сентябри соли 2025 бо судури фармоне дастрасӣ ба 26 шабакаи иҷтимоӣ, аз ҷумла Facebook, Instagram, WhatsApp, YouTube ва X (Twitter)-ро маҳдуд кард. Сабаби асосии ин иқдом — иҷро накардани талаботи қонунӣ аз ҷониби ширкатҳои хориҷӣ оид ба сабти ном ва танзимшавӣ дар дохили кишвар гуфта шуд.
Аммо ин тасмим вокуниши сахти ҷомеаро ба бор овард. Ҳазорон ҷавон, бахусус намояндагони насли Z, бо шиорҳои “Коррупсияро қатъ кунед, на шабакаҳоро” ба кӯчаҳои пойтахт – Катманду баромаданд. Эътирозҳо ба задухӯрди шадид бо нерӯҳои амниятӣ табдил ёфтанд.
Бар асоси гузоришҳои расонаҳои байналмилалӣ, дар натиҷаи тирпаронӣ 17 то 19 нафар кушта ва садҳо тани дигар маҷруҳ шуданд. Ин ҳодиса ҷомеаи шаҳрвандӣ, рӯзноманигорон ва созмонҳои ҳуқуқи башарро ба ташвиш овард. Онҳо иқдоми ҳукуматро ҳамчун “цензураи рақамӣ” ва нақзи озодии баён арзёбӣ карданд.
