Фардо, 10-уми сентябри соли 2025, муҳлати додашуда ба шаҳрвандони хориҷӣ барои қонунӣ гардондани будубошашон дар Русия ба поён мерасад.
Тибқи қарори қаблӣ, муҳоҷирон дар Русия бояд то 30-уми апрели соли 2025 вазъи ҳуқуқии худро танзим мекарданд, аммо бисёре аз муҳоҷирон натавонистанд ин корро анҷом диҳанд. Ва рӯзи 28-уми апрел Владимир Путин, раисҷумҳури Русия бо қабули фармони нав муҳлати қонунӣ кардани будубоши шаҳрвандони хориҷӣ ва бешаҳрвандӣ дар ин кишварро то 10-уми сентябри соли 2025 тамдид кард.
Тибқи қонун бояд муҳоҷирон дар ин муҳлат дар идораи муҳоҷират бо пешниҳоди маълумоти биометрӣ ва пизишкӣ, шаҳодатномаи донистани забони русӣ ва иҷозаи иқомат, худро сабтином кунанд. Инчунин муҳоҷирон бояд ҷаримаҳо ва пули телефонро пардохт карда бошанд ва аз ниҳодҳои давлатӣ қарздор набошанд.
Ҳамзамон муҳоҷирон то замони қонунигардонии будубош ҳаққи хариди амволи ғайриманқул ва нақлиёт, издивоҷ, сабти тиҷорат, кушодани суратҳисоби бонкӣ ва шомил кардани кӯдакон ба кӯдакистону мактабҳоро надоранд.
Дар идораи муҳоҷирати ВКД ба расонаҳо гуфтаанд, ки аз 11-уми сентябр нафаронеро, ки будубошанро дар Русия қонунӣ нагардондаанд ихроҷ ва ҳамчунин ворид шудан ба ин кишварро барои солҳои тӯлонӣ манъ мекунанд.
Ёдовар мешавем, ки пештар мақомоти Тоҷикистон рӯйхати шахсони таҳти назорати Русия бударо нашр кард, ки номи беш аз 120 ҳазор шаҳрванди Тоҷикистон, ки муҳлати ҳуҷҷатҳояшон гузаштааст ё бекор шудаанд, инчунин онҳое, ки қонунвайронкунии маъмурӣ содир кардаанд, оварда шуда буд.
