10-уми сентябри соли 2025, дар Фаронса як мавҷи навбатии эътирозҳои умумимиллӣ зери шиори “Ҳамаро бандед” (Bloquons tout) сурат гирифт.
Гуфта мешавад, ин эътирозҳои хиёбӣ, ки бо иштироки васеи мардум, аз ҷумла донишҷӯён, омӯзгорон, пизишкон ва дигар табақаҳои аҳолӣ ташкил шудааст, пас аз эълони буҷаи давлатии соли 2026 дар ин кишвар рух медиҳад.
Бар пояи нақшаи нав, ҳукумати Фаронса тасмим гирифтааст, ки 43,8 миллиард евро хароҷоти давлатиро коҳиш диҳад. Ин иқдом коҳиши маблағгузорӣ ба бахшҳои муҳим, аз ҷумла нафақа, тандурустӣ ва таҳсилотро дар бар мегирад.
Мардум, ки ин тасмимро ҳамчун беадолатии иҷтимоӣ ва фишори бештар ба табақаи миёнаву поёнии ҷомеа арзёбӣ мекунанд, дар роҳҳо ва марказҳои шаҳрҳо гирдиҳам омада, бо пулис вориди даргириҳо шуданд. Танҳо дар шаҳри Париж беш аз 200 нафар боздошт гардиданд, дар ҳоле, ки шумораи умумии боздоштҳо дар саросари кишвар аз 300 нафар гузаштааст.
Таъйини Севастиен Лекорну ба ҳайси нахуствазири нав низ бо вокуниши манфии ҷомеа рӯ ба рӯ шуд. Бисёриҳо ӯро ҳамчун идомадиҳандаи сиёсати нопопулярии президенти Фаронса, Эммануэл Макрон медонанд.
