Давлати Имороти Муттаҳидаи Арабӣ рӯзи ҷумъа дар вокуниш ба ҳамлаи Исроил ба Давҳаи Қатар сафири Исроил дар ин кишварро эҳзор кард.
Ба иттилои расонаҳои маҳаллӣ, пас аз ҳамлаи Исроил ба Давҳа бо мақсади аз байн бурдани раҳбарони ҲАМОС, дар равобит миёни Имороти Муттаҳидаи Арабӣ ва Исроил таниш ба вуҷуд омадааст.
Гуфта мешавад, афзоиши танишҳо миёни ду кишвар аз як сӯ ба хотири ҳамлаи Исроил ба Қатар ва аз сӯи дигар ба далели ишғоли Каронаи Бохтарӣ аз ҷониби Исроил марбут, ки Иморот қаблан ишғоли Каронаи Бохтариро “хатти сурх”-и худ эълон карда буд.
Ин ҳам дар ҳолест, ки Бинёмин Натанҳоҳу, нахуствазири Исроил рӯзи чоршанбе ба Қатар ҳушдор дода буд, ки ё раҳбарони ҲАМОС-ро ихроҷ кунад ва ё онҳоро боздошт кунад “вагарна мо ин корро хоҳем кард”. Ба ин изҳороти Натанёҳу Имороти Муттаҳидаи Арабӣ вокуниш нишон дода, онро “душманона” хонд.
Таниши равобит миёни Исроил ва Иморот дар ҳолест, ки дар байни кишварҳои арабӣ аз ҳама бештар ва равобити наздиктарро бо Исроил ин кишвар дошт. Ва борҳо ба хотири ин равобити наздик мавриди интиқоди таҳлилгарони араб қарор гирифта буд.
Ба гуфтаи коршиносон, ҳамлаи Исроил ба Доҳаи Қатар кишварҳои арабӣ, бахусус кишварҳои Халиҷро ба он водор карда, ки дар равобити худ бо Амрико ва Исроил бознигарӣ кунанд ва эҳтимол шоҳиди як таҳаввули бузурги сиёсӣ дар минтақа хоҳем буд.
Қарор аст, рӯзҳои якшанбе ва душанбе дар Қатар нишасти изтирории кишварҳои арабӣ ва исломӣ баргузор гардад ва дар он ҳамлаи Исроил ба хоки ин кишвар баррасӣ мешавад.
Ёдовар мешавем, ки рӯзи 9-уми сентябри соли ҷорӣ Исроил ба мақсади аз байни бурдани раҳбарони ҲАМОС ба шаҳри Доҳаи Қатар ҳамла кард, ки дар натиҷа 5 фаластинӣ ва як шаҳрванди Қатар кушта шуданд. Аммо раҳбарони ҲАМОС аз ин ҳамла ҷон ба саломат бурданд.
Тамоми кишварҳои арабӣ ва ғайри арабӣ ин ҳамлаи Исроилро маҳкум карданд ва ҳамбастагии худ бо Қатарро эълон намуданд. Аммо Бинёмин Натанёҳу дар изҳороте гуфт, ки раҳбарони ҲАМОС дар ҳар кишваре, ки бошанд, мавриди ҳамлаи мо қарор хоҳанд гирифт.
