Бино ба гузориши расонаҳои исроилӣ, артиши ин кишвар рӯзи душанбе дар Ғазза 5 бинои маскунии баландошёнаро бомборон намуда, ба пуррагӣ хароб кард.
Артиши Исроил амалиёти худро дар Ғазза аз тариқи ҳамлаҳои ҳавоӣ ва заминӣ идома медиҳад. Дар пайи ин ҳамлаҳои шадид, ба сокинони қисмати шимолии Ғазза ҳушдор дода шудааст, ки ба самти ҷануби ин борика кӯч банданд.
Исроил иддао дорад, ки дар қисмати шимолии Ғазза то ҳанӯз аз се ду ҳиссаи ҷамъияти он боқӣ монданд. Баровардаҳо нишон медиҳад, ки то кунун ҳудуди 300 ҳазор нафар пас аз судури фармони тахлия ба самти ҷануб кӯчидаанд.
Расонаҳои фаластинӣ мегӯянд, Исроил бо аз байн бурдани биноҳҳои баландошёна иддао карда, ки нерӯҳои ҲАМОС дар дохили ин биноҳо паноҳ бурдаанд. Ва ҳамзамон далели ҳамла ба хаймаҳои оворагонро низ вуҷуди ҲАМОС дар байни мардум гуфтааст.
Аммо кишварҳо ва созмонҳои байналмилалӣ мегӯянд, Исроил бо баҳонаи ҳамла ба ҲАМОС Ғаззаро ба хок яксон карданист ва ба ҳеч мавҷуде дар ин борика раҳм намекунад. Таъкид мешавад, ки Исроил қасдан хонаҳои маскуниро хароб мекунад, то мардум ба сӯи ҷануб кӯч банданд.
Масъулони беморхонаҳои Ғазза ба расонаҳо гуфтаанд, ки пас аз нақшаи ишғоли Ғазза Исроил ҳамлаҳои худро ба ин борика шиддат бахшидааст, ки ин кор боиси куштори садҳо бегуноҳ дар рӯз мегардад.
Бино ба гузориши расонаи туркии TRT, пизишкони байналмилалии дар дохили Ғазза гузориш додаанд, ки дар пайи ҳамлаҳои ахири Исроил ҳолати куштори қасдонаи кӯдакон афзоиш ёфтааст. Пизишкон мегӯянд, кӯдаконеро бо ҳолатҳои вазнин ба беморхонаҳо меоранд, ки аз қафаси сина ва сар шиллик шудаанд. Ба гуфтаи онҳо, ин эҳтимоли тариқи тактирандозҳо қасдан аз байн бурдани кӯдакони Ғазза аз ҷониби артиши Исроилро бештар мекунад.
Ин ҳам дар ҳолест, ки бар иловаи авҷи қаҳтӣ ва гуруснагии шадид, ворид нашудани обу ғизо ба Ғазза ва шиддати ёфтани бомборонҳои артиши Исроил вазъияти. инсониро дар ин борика ба шидат сангин кардааст.
Вазорати беҳдошти Фаластин рӯзи душанбе эълон кард, ки аз 7-уми октябри соли 2023 то имрӯз дар пайи ҳамлаҳои ҳавоӣ ва заминии Исроил ва бар асари гуруснагии шадид то кунун 65 ҳазор нафар ҷон бохта, беш аз 160 ҳазори дигар хахмӣ шудааст. Танҳо дар давоми 24 соати гузашта, 35 нафар кушта шудааст.
