Иёлоти Муттаҳидаи Амрико ба Тоҷикистон зиёда аз 75 тонна кумаки озуқаворӣ ба маблағи беш аз 255 ҳазор доллар фиристод.
Ин кумакҳо аз омехтаи ғизоии наск, биринҷ ва сабзавот, ки бо витаминҳо ва маъданҳои зарурӣ ғанӣ гардонида шудааст, иборат буда, барои 40 ҳазор нафар пешбинӣ шудааст.
Тақсимоти бор таҳти назорати Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Кумитаи ҳолатҳои фавқулода ва мудофиаи гражданӣ, Маркази миллии мубориза бо сил ва Ҷамъияти Ҳилоли Аҳмари Тоҷикистон сурат гирифта, он байни беш аз 140 муассисаҳои тиббӣ ва иҷтимоӣ, аз ҷумла клиникаҳои сили шуш, марказҳои равонпизишкӣ, бемористонҳои саратоншиносӣ ва паноҳгоҳҳо барои гурезагон тақсим карда мешаванд.
Дар Сафорати ИМА гуфта мешавад, ки чунин кумакҳо ҷузъи ҳамкориҳои дарозмуддати ду кишвар буда, ба беҳтар намудани сифати зиндагиву саломатии аҳолӣ, бахусус гурӯҳҳои осебпазир ва дастгирии соҳаи иҷтимоии Тоҷикистон равона шудаанд.
Гуфта мешавад, ин аввалин чунин навъ кумаки Амрико ба Тоҷикистон набуда, ин кишвар аз соли 2007 то имрӯз тақрибан 1000 тонна маҳсулоти ғанӣ гардонидашуда ба маблағи зиёда аз 2,2 миллион доллар ба Тоҷикистон фиристодааст.
