ОМОН-и Русия дар яке аз хобгоҳҳои наздикии метрои Строгинои Маскав беш аз 500 муҳоҷир, аз ҷумла зодагони Тоҷикистонро тафтиш кардаанд.
Ба гуфтаи муҳоҷирон рейд соати 5 субҳ оғоз шуда, одамонро бо лаҳни тунд ба кӯча баровардаву ҳуҷҷатҳояшро санҷидаанд. Кормандони мақомоти рус аввал занонро тафтиш кардаву баъзеашонро, ки ҳуҷҷатҳояшон мушкил доштааст, бо худ бурдаанд.
Гуфта мешавад, дар ин хобгоҳ тақрибан 200 шаҳрванди Тоҷикистон низ зиндагӣ мекунанд, ки аксарашон расман дар ширкати сохтмонӣ кор мекунанд ва санадҳои заруриро доранд.
Ба ин монанд рейдҳо дар дигар минтақаҳои Русия, бахусус ҷойҳое ки бештар муҳоҷирон ҷамъ мешаванд, мисли қаҳвахонаву бозор ва хобгоҳ идома дорад.
Дар баробари тафтиши асноди будубош, мақомоти рус, инчунин, онҳоеро меҷӯянд, ки ба наздикӣ шаҳрвандии Русияро гирифтаанду худро дар комисариатҳои ҳарбӣ сабти ном накардаанд. Ин гуна афродро ба комисариатҳои ҳарбӣ мебаранду ба ҷанги зидди Украина мефиристанд ва ҳар нафаре, ки рафтан ба хидмат ё ҷангро рад кард, шаҳрвандияш бекор ва аз Русия ихроҷ мешавад.
Ёдрас мешавем, ки раисҷумҳури Русия Владимир Путин қонунеро ба имзо расонда буд, ки тибқо он аз 1 январи то 10 сентябри соли 2025 муҳоҷирон бояд будубоши худро дар Русия қонунӣ мегардонданд.
Тибқи қонун бояд муҳоҷирон дар ин муҳлат дар идораи муҳоҷират бо пешниҳоди маълумоти биометрӣ ва пизишкӣ, шаҳодатномаи донистани забони русӣ ва иҷозаи иқомат, худро сабтином кунанд. Инчунин муҳоҷирон бояд ҷаримаҳо ва пули телефонро пардохт карда бошанд ва аз ниҳодҳои давлатӣ қарздор набошанд.
Дар идораи муҳоҷирати ВКД ба расонаҳо гуфта буданд, ки аз 11-уми сентябр нафаронеро, ки будубошашонро дар Русия қонунӣ нагардондаанд, ихроҷ ва ҳамчунин ворид шудан ба ин кишварро барои солҳои тӯлонӣ манъ мекунанд.
Ёдовар мешавем, ки пештар мақомоти Тоҷикистон рӯйхати шахсони таҳти назорати Русия бударо нашр кард, ки номи беш аз 120 ҳазор шаҳрванди Тоҷикистон, ки муҳлати ҳуҷҷатҳояшон гузаштааст ё бекор шудаанд, инчунин онҳое, ки қонунвайронкунии маъмурӣ содир кардаанд, оварда шуда буд ва маълум нест чанд нафари онҳо будубоши худро дар Русия қонунӣ гардондаанд.
