Бар асари садамаи мошинҳо дар шоҳроҳи Душанбе-Хқҷанд 5 узви як хонавода, ки ба Душанбе сафар доштаанд, ҷон бохтанд.
Бино ба иттилои Кумитаи ҳолатҳои фавқулодда ва мудофиаи граждании Тоҷикистон, ин фоҷиаи мудҳиш соати 11:30 дақиқаи рӯзи 20-уми сентябри соли ҷорӣ дар километри 174-уми шоҳроҳи Душанбе-Хқҷанд, дар ҳудуди ноҳияи Шаҳрстон рух додааст.
Гуфта мешавад, панҷ узви як оила, ки ҳама сокинони ноҳияи Истаравшан будаанд, мехостаанд ба Душанбе сафар кунанд, ки нохост мошинашон ба як мошини боркаши “Дулан” бархӯрда, таркиш ба вуҷуд меояд ва ҳама ҳалок шуданд.
Дар хабари КҲФ гуфта мешавад, ки ҳалокшудагони ин садама, ронанда ва падари хонавода Муродов Амирбеки 45-сола, модари хонадон 41-сола, ду духтар, ки яке 10 ва дуюмӣ 9 сол дошт ва писари панҷсола мебошанд.
Гуфта мешавад, ронандаи 24-солаи мошини “Дулан” – Азамов Ҷамолиддин, истиқоматкунандаи шаҳри Истаравшан, деҳаи Куйбеш бо ҷароҳатҳои ҷисмӣ ба беморхони марказии ноҳияи Шаҳристон интиқол дода шудаст.
То ҳанӯз сабаби ин фоҷиаи маргбор дақиқ нест, вале ба гуфтаи КҲФ, эҳтимоли зиёд суръати баланди ҳаракати мошинҳо бошад, ки ронандагон вақти рӯ ба рӯ омаданд аз уҳдаи идораи он набаромадаанд.
Ин бори аввал нест, ки дар шоҳроҳи Душанбе-Хуҷанд чунин ҳодисаҳои маргбор рух медиҳад. Агарчи бо суръати баланд рондани мошинҳоро яке аз сабабҳои чунин ҳодисаҳо мегӯянд, вале аксари ронандагон аз ноҳамвор будани роҳҳо ва шароити хуб надоштани тӯнелҳои ин роҳ шикоят мекунанд. Ин ҳам дар ҳолест, ки беш аз 10 сол мешавад, ширкати “Инновейтив Роуд Солюшнз ЛТД” (IRS), ки гуфта мешавад, ба наздикони раисҷумҳур Эмомалӣ Раҳмон тааллуқ дорад, ин роҳро пулакӣ карда ва онро идора мекунад. Вале ҳоло ҳам ба шароити замона ҷавобгӯ нест.
