Як писарбачаи 13-солаи аҳли Қундузи Афғонистон бо пинҳон шудан дар дохили қуттии чархҳои ҳавопаймо аз Кобул ба Деҳлии Ҳиндустон саломат расид.
Ин писарбача дар Фурӯдгоҳи Деҳлӣ аз ҷониби маъмурони амниятии он боздошт ва мавриди бозҷӯӣ қарор гирифт. Ӯ ба маъмурони фурӯдгоҳ гуфта, ки тавонистааст пинҳонӣ вориди Фурӯдгоҳи Кобул шавад ва пеш аз парвоз худро ба қуттии чархҳои қафои ҳавопаймо пинҳон кунад.
Бино ба иттилои хабаргузории “Industan Times”, ҳодиса тахминан соати 11:10-и рӯзи якшанбе, 21-уми сентябр рух дод. Ба гузориши ин хабаргузорӣ, писарбачаи афғон бо парвози RQ-4401 ширкати ҳавопаймоии “Kam Airlines” хатсайри Кобул-Деҳлӣ дар як сафари 94-дақиқаӣ саломат ба Деҳлӣ фурӯд омад.
Бар асоси иттилои ин хабаргузорӣ, писарбачаи афғон пас аз чанд соати бозҷӯӣ соати 16:00-и ҳамон рӯз тавассути парвози дигар ба Кобул баргардонида шуд. Ҳадаф аз сафар ва зери чархҳои ҳавопаймо пинҳон шудани ин писарбачаи афғон маълум нест. Танҳо гуфта мешавад, эҳтимол аз “рӯи кунҷковӣ” бошад.
Ин ҳодиса ҳолати мушобеҳи соли 2021-ро ба ёд меорад. Замоне ки Толибон дар Кобул ба сари қудрат омаданд, ҳазорҳо нафар барои фирор аз Афғонистон худро ба Фурӯдгоҳи Кобул расониданд ва баъзе ҷавонон дар зери чархҳо ва болҳои ҳавопаймоҳои низомии Амрико худро овезон карданд, то аз Афғонистон фирор кунанд, ки мутаассифона ҳеч кадоме зинда намонд.
