Президенти Фаронса Эммануэл Макрон эълон кард, ки кишвараш давлати Фаластинро расман эътироф мекунад.
Ӯ ин тасмими кишварашро рӯзи 22-уми сентябр, дар қароргоҳи Созмони Милали Муттаҳид дар шаҳри Ню-Йорк зимни суханрониаш дар ҳамоиши байналмилалии сарони давлатҳо ва ҳукуматҳо, эълон кард.
Ҳамоиш бо ташаббуси Фаронса ва Арабистони Саудӣ доир гардида, ҳадафи асосии он эҳёи роҳҳалли таъсиси “ду давлатӣ” (исроилӣ ва фаластинӣ) дар чорчӯби сарҳадҳои байналмилалӣ эътирофшуда мебошад.
Ба гуфтаи Макрон, ин иқдом барои “таъмини сулҳ миёни ду миллат” равона гашта, аз зарурати озод кардани 48 гаравгон аз дасти “ҲАМОС” ва қатъи амалиёти низомии Исроил дар Навори Ғазза, аз ҷумла бомбаборонҳо, қатли ом ва муҳоҷиркунонии иҷборӣ гуфтааст.
Пас аз суханронии Макрон, сарвазири Белгия Барт Де Вевер, инчунин роҳбарони Люксембург, Малта ва Монако низ мавқеи худро эълон ва давлати Фаластинро расман эътироф карданд. Андорра низ худи ҳамон рӯз ба ин иқдом ҳамроҳ шуд.
Бо дарназардошти эълонҳои қаблии Британияи Кабир, Канада, Австралия ва Португалия, теъдоди давлатҳое, ки мавҷудияти Фаластинро ба расмият шинохтаанд, акнун ба 156 узви СММ мерасад.
Фаластиниҳо ин иқдомро қадами торихӣ номиданд, вале мақомоти исроилӣ онро баръакс, маҳкум намуда, “хатарнок” ва “ҳимоят аз терроризм” донистааст.
Коршиносон бар ин назаранд, ки чунин иқдомҳо бештар аҳамияти рамзӣ доранд ва мақоми байналмилалии Фаластинро мустаҳкам мекунанду вазъи онро дар созмонҳои ҷаҳонӣ тағйир медиҳанд, вале мушкилоти воқеии амниятӣ, марзӣ ва вазъи сокинонашро ҳал намесозанд.
