Нархи гӯшт дар Тоҷикистон нисбат ба шароити иқтисодии аҳолӣ хеле гарон маҳсуб мешавад. Бо вуҷуди афзоиши истеҳсоли гӯшт, нархҳо дар бозорҳо арзон намешаванд.
Тибқи маълумоти оморӣ, ки дар расонаи давлатӣ нашр шудааст, дар моҳҳои январ–августи соли 2025 ҳаҷми истеҳсоли гӯшти чорвои калон ва майда дар Тоҷикистон ба 164 055 тонна расида, нисбат ба ҳамин давраи соли 2024 10,3% зиёд шудааст. Саршумори чорвои калони шохдор ва гӯсфанду буз низ сол ба сол афзоиш ёфтааст.
Бо вуҷуди афзоиш истеҳсоли гӯшт, нархҳо дар бозорҳои истеъмолӣ пайваста боло меравад. Айни замон як кило гӯшт дар бозорҳо аз 75 то 100 сомонӣ нарх дорад, ки назар ба соли 2018 қариб ду баробар зиёд аст. Сабабҳо ба афзоиши хароҷоти нигоҳубини чорво, арзиши хӯроки чорво ва фасли тобистон, ки чорво ба чарогоҳ мебаранд, рабт дода мешавад.
Коршиносон таъкид мекунанд, ки барои дастрасии арзон ва афзоиши истеҳсоли гӯшт бояд фермаҳои махсуси говҳои зотии гӯштӣ ва корхонаҳои хӯроки омехтаи чорво дар шаҳру ноҳияҳо таъсис дода шаванд.
Нархи баланд ва дастрас набудани гӯшт ҳамеша боиси норозигии шаҳрвандон аст. Ба ин далел, аксари аҳолӣ тавони харидани гӯштро надоранд.
