Дар вилояти Новосибирски Русия кормандони пулис, Росгвардия ва Шуъбаи ҳарбии Кумитаи тафтиш дар яке аз корхонҳо дар деҳаи Крупская тафтиш (Рейд) гузарониданд.
Ба иддаои мақомоти рус ҳадафи ин тафтиш ошкор кардани муҳоҷирони ғайриқонунӣ ва ҳамчунин шаҳрвандоне буда, ки шиносномаи Русия гирифтаанд, вале худро дар қайди ниҳодҳои ҳарбӣ нагузоштаанд.
Дар наворҳое, ки аз ин тафтиш дар шабакаҳо нашр шудаанд, дида мешавад, ки ҳамаи кормандони корхонаро ба кӯча бароварда, ҳуҷҷатҳои ҳамаро тафтиш мекунанд. Мақомоти рус мегӯянд, ки 450 нафарро санҷида, 17 нафареро ошкор кардаанд, ки дар ҳудуди Русия бо вайрон кардани қонунгузории муҳоҷиратӣ қарор доштанд.
Дар натиҷа ба се муҳоҷир ҷаримаи маъмурӣ аз 2 то 40 ҳазор рубл таъйин шуда, ба 13 нафар қарори манъи вуруд ба Русия ба муддати 5 сол ва ба як нафари дигар ба муддати 10 сол қабул гардидааст. Ҳоло ин афрод ба Маркази муваққатии нигоҳдории шаҳрвандони хориҷӣ қарор доранд, то ки аз Русия хориҷ карда шаванд.
Инчунин мақомоти Русия ҳангоми гузаронидани тафтиш дар боғу бустонсароҳои наздишаҳрии Новосибирск 51 шаҳрванди хориҷӣ тафтиш карда, панҷ нафарашонро ба шуъбаҳои ВКД бурдаанд. Маълум нест дар миёни боздоштшудаҳо зодагони Тоҷикистон ҳастанд ё на.
Ба ин монанд тафтишу бозҷӯиҳои муҳоҷирон дар дигар минтақаҳои Русия, бахусус ҷойҳое ки бештар муҳоҷирон ҷамъ мешаванд, мисли қаҳвахонаву бозор, хобгоҳ ва ҳатто толорҳои варзишиву консертӣ идома доранд.
Дар баробари тафтиши асноди будубош, мақомоти рус, инчунин онҳоеро меҷӯянд, ки ба наздикӣ шаҳрвандии Русияро гирифтаанду худро дар комисариатҳои ҳарбӣ сабти ном накардаанд. Ба гуфтаи худи муҳоҷирон, ин гуна афродро ба комисариатҳои ҳарбӣ мебаранду ба ҷанги зидди Украина мефиристанд ва ҳар нафаре, ки рафтан ба хидмат ё ҷангро рад кунад, шаҳрвандияш бекор ва аз Русия ихроҷ мешавад.
