Дар Русия пешниҳод шудааст, ки шаҳрвандони хориҷие, ки вориди ин кишвар мешаванд, аз санҷиши ҳатмӣ бо полиграф ё детектори дурӯғ гузаронида шаванд.
Ба иддаои муаллифи ин тарҳ, фаъоли ҷамъиятӣ Алексей Ярошенко санҷиши маъмулии ҳуҷҷатҳо наметавонад шаҳрвандонро аз ҷиноятҳои ғайриқонунӣ пурра муҳофизат кунад ва чунин чора имкон медиҳад, ки ворид гардидани – ба гуфтааш – ҷинояткорон ва террористон ба Русия коҳиш ёфта, ҳолатҳои убури ғайриқонунии марз ва истифодаи ҳуҷҷатҳои сохта пешгирӣ гарданд.
Ба андешаи Ярошенко, пурсиш бо нармафзори дурӯғсанҷ ё ҳамон детектори дурӯғ инчунин онҳоеро, ки кӯшиши ворид шудан ба Русияро танҳо бо ҳадафи гирифтани кумакпулиҳо ва роҳандозии корҳои қаллобона доранд, муайян намуда, дар баробари паст намудани сатҳи ҷинояткорӣ, низоъҳои байниқавмӣ низ пешгирӣ мегардад.
Чунин пешниҳод аз ҷониби ин фаъоли рус дар ҳоле садо медиҳад, ки пас аз ҳодисаи ҳамла ба бинои “Крокус Сити Ҳолл”, ки гумонбарони асосияш муҳоҷирон мебошанд, дар Русия фазои муҳоҷирбадбинӣ ба авҷи худ расида, бо ин баҳона чандин қонунҳои наве дар Думаи давлатии Русия пешниҳоду қабул гардид, ки шароити кор ва будубош дар ин кишварро юарои муҳоҷирон сахттар кард.
Ин пешниҳоду қабули қонунҳо дар ҳоле аст, ки мувофиқи оморҳои расмӣ, Русия худ ба беш аз 2,2 миллион қувваи корӣ ниёз дорад, вале ба гуфтаи коршиносон, ҳар гоҳ дар дохили Русия мушкилоте пайдо шавад, мақомот фазои муҳоҷирбадбиниро ба вуҷуд меоранд, то таваҷҷуҳи шаҳрвандонро аз мушкилоти асосӣ дигар тараф равона кунанд ва маҳз ҳодисаи “Крокус” ба мақомот ин имконро фароҳам овардааст.
