Мақомоти шаҳри Душанбе қарор қабул карданд, ки то соли 2030 ҳаракати электросамокатҳо, электроскутерҳо ва дигар василаҳои инфиродии нақлиёт дар роҳҳои мошингард ва минтақаҳои пиёдагард манъ мешавад.
Раёсати ВКД дар пойтахт хабар дод, ки ин иқдом бо қарори Маҷлиси вакилони халқи шаҳри Душанбе амалӣ гардида ва ҳадафи он таъмини амнияти роҳҳо ва танзими истифодаи чунин навъи нақлиёт мебошад.
Ба гуфтаи мақомот, маҳдудият ба хотири пешгирии садамаҳо бо иштироки электросамокатҳо, коҳиши халал расондан ба ҳаракати мошинҳо ва пиёдагардон ва ҳифзи манфиатҳои ҳамаи мардум дар роҳҳо ҷорӣ шудааст.
Истифодаи ин навъи нақлиёт танҳо дар ҷойҳои махсус иҷозат дода мешавад. Мақомот гуфтанд, ки ин манъкунӣ то замоне идома хоҳад ёфт, ки зерсохтори муносиб барои истифодаи бехатари онҳо дар шаҳр таъсис дода шавад.
Ҳамзамон аз шаҳрвандон, бахусус волидайни кӯдакони ноболиғ, хоҳиш шудааст, ки фарзандонашонро аз истифодаи чунин воситаҳои нақлиётӣ боздоранд ва онҳоро беназорат нагузоранд.
Бо вуҷуди ин, электроскутерҳо ва электросамокатҳо дар солҳои охир дар Душанбе ба яке аз василаҳои қулай ва арзон барои иҷрои корҳои рӯзмарраи шаҳрвандон, аз ҷумла расондани ғизо ва фармоишҳои хурд, табдил ёфтаанд. Манъи истифодаи онҳо метавонад барои бисёре аз сокинон хароҷоти иловагӣ ба миён оварад. Ҳанӯз маълум нест, ки оё ин маҳдудият ба фаъолияти хидматрасониҳои таҳвили ғизо, ки асосан бо истифода аз скутерҳо анҷом мешаванд, дахл дорад ё на.
