Бо гузашти ду соли ҷанг дар Ғазза дар натиҷаи бомборонҳои беисти Исроил ин борика ба як харобазор мубаддал шудааст.
Вазорати беҳдошти Ғазза дар остонаи дусолагии ҷанг оморҳоеро нашр кардааст, ки аз вазъияти ҳавлноки ин борика нақл мекунад. Таъкид мешавад, ки мушкилоти мардуми Ғазза, аз ҷумла тақрибан пурра фалаҷ шудани зерсохторҳои иҷтимоӣ, аз байн рафтани хидматрасониҳои тандурустӣ ва таълимӣ, бар иловаи муҳосираи шадид, фарқру гуруснагӣ баёнгари бузургтарин фоҷеаи инсонӣ дар торихи муосир аст.
Мувофиқи омори расмии Вазорати беҳдошт ва дигар ниҳодҳои омории Ғазза, 2,3 миллион аҳолии ин борикаро хатари наслкушӣ таҳдид мекунад. Ҳамзамон таъкид мешавад, ки аз 7-уми октябри соли 2023 то имрӯз Исроил бар болои Ғазза 125 ҳазор тонна маводҳои инфиҷрӣ партоб кардааст, ки 90% хонаҳои маскунӣ ва иншооти ҷамъиятӣ, аз ҷумла беморхонаҳо, мактабҳо ва масҷиду идораҳо пурра ва қисман зарар дидаанд.
Бар асари ин ҳамлаҳои шадид то кунун 67 ҳазор нафар кушта шуда, ки беш аз 70% онҳоро занону кӯдакон ва пиронсолон дар бар мегиранд. Гуфта мешавад, то кунун ҳудуди 10 ҳазор нафари дигар зери овораҳо монда нопадид шудаанд. Аммо омори захмиён ба 180 ҳазор наздик шудааст.
Мувофиқи ин омор, 2700 оила ба таври комил кушта шуданд, ки теъдодашон ба 8563 нафар мерасад ва ин хонаводаҳо комилан аз рӯйхати сабти асноди шаҳрвнадии Ғазза пок шуданд. Аммо 6020 оилаи дигар танҳо як нафарӣ зинда бондаанд.
Ин омор мегӯяд, 2356 нафар ҳангоми навбат истодан барои дарёфти ғизо аз ҷониби нерӯҳои исроилӣ кушта шуда ва 460 нафар аз гуруснагӣ ҷон бохтанд, ки 154 нафарашон кӯдакон ҳастанд.
Дар умум гузоришҳои аввалӣ хасорати инсонӣ ва ғайриинсонии Ғаззаро ба 60 миллиард доллари амрикоӣ баровард мекунанд. Дар омор зикр гардида, ки то кунун 80% Ғазза зери тасарруфи нерӯҳои исроилӣ қарор дорад.
Гуфта мешавад, бо гузашти ду соли ҷанги шадиди Исроил дар Ғазза ва гуруснагиву фақр, набудани шароити табобатӣ ва дармонӣ дар бемористонҳо боз ҳам мардуми ин борика барои ҳифзи замини худ устуворӣ мекунанд.
Ин ҳам дар ҳолест, ки ҳайати музокиракунандагон аз Амрико, Миср, Қатар ва Исроил дар Шарму Шайхи Миср ҷамъ омадаанд, то тарҳи пешниҳодии Доналд Трамп, раисҷумҳури Амрико дар мавриди оташбас дар Ғаззаро баррасӣ кунанд.
Бино ба иттилои сухангӯи Вазорати корҳои хориҷии Қатар Моҷид Ал-Ансорӣ, музокирот байни ҳайатҳо дар бораи баррасии 20 банди ин тарҳ аз дирӯз, 6-уми октябр оғоз ёфт ва ҳанӯз идома дорад. Ӯ таъкид кард, ки дар равнди музокирот пешравӣ мушоҳида мешавад.
