Дар вилояти Суғд як ҷавони 34-сола бо иттиҳоми куштани падараш боздошт шуд. Ҳодиса дар ҷамоати Дадобой Холматови ноҳияи Бобоҷон Ғафуров рӯй додааст.
Акбар Шарифӣ, сухангӯи Раёсати корҳои дохилии вилояти Суғд зимни тасдиқи ин хабар гуфта, ки падару писар дар ҳолати мастӣ бо ҳам баҳс кардаанд ва дар натиҷа писар падари 67-солаашро зада ба ҳалокат мерасонад ва баъдан ҷасадро ба ҳавз мепартояд.
Дар як наворе, ки Раёсати корҳои дохилии вилояти Суғд нарш кард, худи ҷавон ин амалро эътироф мекунад ва мегӯяд, ки ҷасади падарашро барои пинҳон кардани ҷиноят ба об андохтааст.
Ҳоло писар боздошт ва алайҳи ӯ бо иттиҳоми куштани шахс парванда боз шудааст. Парвандае, ки бар зидди ин ҷавон боз шудааст, то 15 соли зиндон таҳдидаш мекунад.
Ин бори аввал нест, ки дар Тоҷикистон чунин ҳодисаи мудҳиш рух медиҳад. Солҳои охир чанд маврид сабт шудааст, ки падарон аз дасти писарон ё писарон аз дасти падарон ба ҳалокат расидаанд. Мақомоти пулис таъкид мекунанд, ки таҳқиқоти парвандаи мазкур идома дорад ва ҷараёни он ба таври шаффоф анҷом хоҳад ёфт.
