Рӯзи 15 октябр 2025, Маҷлиси намояндагони Тоҷикистон Қонуни “Дар бораи мақоми омӯзгор”-ро тасвиб кард. Қонуни нав мақоми касбӣ, ҳуқуқу уҳдадориҳо ва кафолатҳои омӯзгоронро муқаррар намуда, фаъолияти онҳоро аз назари ҳуқуқӣ таҳким мебахшад.
Тавре Вазорати маориф ва илми Тоҷикистон хабар медиҳад, қонуни мазкур ба омӯзгорон шаъну шараф ва ҷойгоҳи муайяни касбӣ медиҳад ва ҳуқуқи онҳоро дар доираи фаъолияти омӯзгорӣ ҳифз мекунад. Қонуни қабулшуда ба баланд бардоштани сифати таълим ва беҳтар намудани шароити кории омӯзгорон равона шудааст.
Баъд аз қабули қонун, омӯзгорон умедворанд, ки онҳо аз обунаи маҷбурӣ ва ҷалби омӯзгорон ба корҳои берун аз вазифаи худашон, аз ҷумла дар рустоҳо ба ҷамъоварии пахта, иштирок дар шанбегиҳо ва дигар корҳои ғайр аз вазифаи асосии худ, муҳофизат мешаванд ва дигар маҷбур ба иҷрои корҳое нахоҳанд буд, ки ҷузъи вазифаи касбии онҳо нест.
Коршиносон мегӯянд, маоши паст ва ҷалби зиёди омӯзгорон ба корҳои берун аз вазифаи худашон онҳоро онҳоро аз интихоби ин касб пушаёмон карааст.
Ба бовари онҳо, бо сабаби шароити пасти корӣ ва имтиёзҳои маҳдуд омӯзгорон касби худро тарк карда, ба муҳоҷирати корӣ рафтаанд. Ҳангоми набудани шумори кофии омӯзгорон, мактабҳо ва муассисаҳои таълимӣ бо камбуди кадрҳо рӯбарӯ ҳастанд.
Вазорати маориф ва илми Тоҷикистон борҳо аз камбуди омӯзгорон хабар дода, таъкид кардааст, ки ин вазъият ба сифати таълим ва тарбияи насли наврас таъсири манфӣ мерасонад.
