Вазорати тандурустии Русия ба тартиби ташхиси ҳатмии тиббии шаҳрвандони хориҷӣ, шахсони бе шаҳрвандӣ ва довталабони мақоми паноҳандагӣ тағйирот ворид кардааст.
Аз 1-уми марти соли 2026 муҳоҷирон аз ташхис барои муайян кардани гепатитҳои вирусии В ва С гузаронида мешаванд. Ин ҳам дар ҳолест, ки шаҳрвандони хориҷӣ барои мавҷудияти маводи мухаддир ва бемориҳое, ки барои атрофиён хатар доранд, аз ҷумла ВИЧ, сил, сифилис ва лепра санҷида мешаванд.
Ғайр аз васеъ кардани рӯйхати ташхисҳои ҳатмӣ, вазорат пешниҳод кардааст, ки барои духтурон ва муассисаҳои тиббӣ, ки тартиби ташхиси тиббии муҳоҷиронро нақз мекунанд, ҷаримаҳои маъмурӣ ҷорӣ шаванд.
Вазорати тандурусӣ иддао дорад, ки ин тағйирот бо мақсади пешгирии бемориҳо ва амнияти ҷамъиятӣ дар Русия гирифта шудаанд.
Ин тағйирот дар ҳолест, ки чанде пеш зимни сафари Владимир Путин, раисҷумҳури Русия ба Тоҷикистон миёни Тоҷикистон ва Русия созишномае ба имзо расид, ки тибқи он муҳоҷирони кории тоҷик қабл аз муҳоҷират дар ватанашон метавонанд аз “муоинаи тиббӣ” гузаранд.
Пештар ташхис дар ҳудуди Русия анҷом мешуд ва даҳҳо муҳоҷирро бо баҳонаи гирифтор будан ба бемориҳои сироятӣ аз ин кишвар ихроҷ мекарданд ва ҳоло маълум нест, ки ин созиши нав то куҷо ба муҳоҷирон дар ин самт сабукӣ ё сангинӣ меорад.
