Владимир Путин ва Доналд Трамп қасд доранд, дар давоми ду ҳафтаи оянда дар Будапешти Венгрия мулоқот кунанд. Мавзуи асосии музокирот ёфтани роҳҳои қатъи ҷанги Украина хоҳад буд.
Бино ба иттилои расонаҳо, мақомоти Венгрия розӣ шудааст, ки мулоқоти раҳбарони Амрико ва Русияро дар Будапешт баргузор кунад ва вориду хориҷ шудани Путин ба кишварро таъмин кунад, гарчанде, ки ӯ таҳти фармони боздошти Додгоҳи Байналмилалии Ҷиноятӣ қарор дорад ва ҳукумати Венгрия таъкид ҳам кардааст, ки ин фармон ба баргузории мулоқот монеъ намешавад.
Қарори Венгрия барои баргузории ин мулоқот аз ҷониби чанд кишвари аврупоӣ интиқод шудааст.
Гуфта мешавад, дар музокирот, Трамп ва Путин роҳҳои эҳтимолии хотимаи ҷанг дар Украина ва инчунин масъалаҳои марбут ба таҳвили мушакҳои дурбари Tomahawk-и Амрико ба Украинаро муҳокима хоҳанд кард.
Президенти Украина Владимир Зеленский, ки худ имрӯз ба Амрико сафар кард, аз он изҳори нигаронӣ кардааст, ки мулоқоти Трамп ва Путин метавонад ба дастгирии ИМА ба Украина таъсир расонад.
Дар ҳамин ҳол Кремл хабар додааст, ки машваратҳои пешакии байни вазирони умури хориҷии Русия ва ИМА Сергей Лавров ва Марко Рубио аллакай ҳафтаи оянда баргузор хоҳанд шуд.
Бояд гуфт, торихи дақиқи мулоқоти Путин ва Трамп ҳанӯз тасдиқ нашудааст, аммо интизор меравад, ки он дар давоми ду ҳафтаи оянда баргузор шавад.
Пештар Путин ва Трамп дар Аляска мулоқот карда буданд, вале он мулоқот ва музокироти ҷонибҳо натиҷаи намоён надода буд.
