Волии Толибон дар вилояти Балхи Афғонистон, Юсуф Вафо дар як сафар ба шаҳри Душанбе бо намояндагони Шӯрои уламои Тоҷикистон ва мақомоти амниятии кишвар дидору гуфтугӯ анҷом дод.
Ба иттилои расонаҳо Афғонистон, Вафо дар ин мулоқот нусхаҳое аз қонуни “Амр ба маъруф ва наҳй аз мункар”-и дастурҳои раҳбари Толибон Ҳибатулло Охундзода ва чанд маводи дигар, ки андешаҳои Толибонро дар бар мегирад, ба Шӯрои уламои Тоҷикистон тақдим намудааст.
Ҳадафи ин иқдом “фаҳмондани ҳадаф ва андешаи Толибон” гуфта шудааст. Ин китобҳо ба раиси Шӯрои уламои Тоҷикистон Саидмукаррам Абдуқодирзода ва дигар олимони шинохтаи тоҷик тақдим шудааст. Вафо таъкид кардааст, ки Тоҷикистону Афғонистон ду кишвари исломӣ мебошанд ва даъват намудааст, ки сафари уламои тоҷик ба Афғонистон ва ҳамкориҳо дар бахши мазҳабӣ тақвият ёбанд.
Ӯ ҳамчунин аз кумаки Узбекистон дар сохтмони мадрасаи бузург дар Балх хабар дода, аз уламои тоҷик даъват кардааст, ки дар рушди муассисаҳои исломӣ дар Афғонистон саҳм гузоранд.
Коршиносони сиёсӣ бар ин боваранд, ки Толибон дар талошанд равобити худро бо Тоҷикистон барқарор кунанд.
