Шаби 25-уми октябри соли 2025 Русия бо истифода аз паҳподҳои интиҳорӣ пойтахти Украина, шаҳри Киевро ҳадаф қарор дод.
Мақомоти Украина мегӯянд, ки дар натиҷаи ин ҳамлаи густурда се нафар, аз ҷумла як духтари 19-сола ва модари 46-солаи ӯ кушта шуданд.
Ба иттилои Вазорати корҳои дохилии Украина, 29 нафар, аз ҷумла ҳафт кӯдак дар ин ҳамла ҷароҳат бардоштаанд. Ҳамла боиси оташ гирифтани ду бинои истиқоматӣ дар ноҳияи Деснянскийи пойтахт шуд ва гурӯҳҳои наҷотдиҳӣ даҳҳо нафарро аз биноҳои 9 ва 16-ошёна тахлия карданд.
Бино ба изҳороти нерӯҳои ҳавоии Украина, Русия дар ин ҳамла 101 паҳпод истифода бурд, ки 90-тои онҳо безарар гардонида шудаанд. Ин ҳамла дуюмин ҳамлаи шабонаи пайдарпай ба Киев дар чанд рӯзи охир буд, ки аз мардуми осоишта чанд нафар кушта шуд.
Президенти Украина, Владимир Зеленский пас аз ин ҳамла аз кишварҳои ғарбӣ даъват кард, то системаи дифои ҳавоии бештар ба Украина таъмин кунанд.
Вазорати дифои Русия эълон кардааст, ки ҳадафҳои ҳамла ин бор инфрасохтори энергетикӣ, роҳҳои оҳан ва нуқтаҳои ҷойгиршавии нерӯҳои низомии Украинаро дар бар мегирифт.
Киев дар ҳафтаҳои охир пайваста зери ҳамлаҳои шабонаи паҳподҳо ва мушакҳо қарор дорад, ки боиси хисорот ва талафоти ҷонии зиёд дар байни аҳолии осоишта шудааст.
