Рӯзи 30-уми октябр раисҷумҳури Амрико Доналд Трамп ва раҳбари Чин Си Ҷинпин дар шаҳри Сеули Куриёи Ҷанубӣ мулоқот карданд.
Мулоқоти ду раҳбари кишварҳои абарқудрат дар расонаҳои ҷаҳонӣ “муҳим ва зарурӣ” арзёбӣ шуда, асосан ба баҳсҳои тиҷоратии миёни Амрико ва Чин бахшида шуда буд. Расонаҳо навиштаанд, ки ин дидор беш аз якуним соат идома ёфтааст.
Трамп ин мулоқотро “ҷолиб” арзёбӣ карда, гуфтааст, ки Вашингтон ва Пекин метавонанд ба зудӣ ба созиши тиҷоратӣ даст ёбанд. Ба гуфтаи ӯ, масъалаи дастрасии Амрико ба маъданҳои камёб, ки Чин содироташро маҳдуд карда буд, ҳалли мусбат пайдо кардааст.
Дар ин мулоқот Трамп изҳор дошта, ки кишвараш омода аст барои коҳиши танишҳо, таърифаҳои воридотиро кам кунад, вале дақиқ нагуфт, ки то кадом андоза онҳоро кам хоҳад кард.
Ғайр аз масъалаҳои тиҷоратӣ, Трамп гуфт, ки дар мавриди вазъ дар Украина низ бо Си Ҷинпин гуфтугӯ доштаанд ва омодаанд якҷо дар ин самт ҳамкорӣ кунанд. Аммо баҳси масъалаи Тайван, ки барои Чин хеле ҳассос аст, дар ин дидор, тибқи иттилои мавҷуда, баррасӣ нашудааст.
Трамп ҳамчунин эълон кард, ки қасд дорад дар моҳи апрели соли 2026 ба Чин сафар кунад ва пас аз он раҳбари Чин ба Амрико хоҳад омад.
То ҳол ҷониби Чин дар бораи ҷузъиёти ин мулоқот расман изҳори назар накардааст.
