Чанде аз мусофирони тоҷик, ки дар байнашон кӯдакон низ ҳастанд ва мехостанд аз Русия ба Тоҷикистон биёянд, дар роҳҳои Қазоқистон дармонданд.
Кумитаи ҳолатҳои фавқулоддаи Қазоқистон субҳи 7-уми ноябр хабар дод, ки 53 шаҳрванди Тоҷикистон, ки бо автобус аз Русия ба Тоҷикистон мерафтанд, дар роҳ автобуси онҳо хароб шуд ва мақомот огоҳ шуда, онҳоро аз сармои сахт наҷот дода, то таъмири автобус ба ҷои амн бурда шуданд.
Гуфта мешавад, аз ин 53 мусофир 8 нафарашон кӯдакони ноболиғ будаанд. Кумитаи ҳолатҳои фавқулоддаи Қазоқистон мегӯяд, автобуси мусофирон, ки аз Федератсияи Русия ба Ҷумҳурии Тоҷикистон ҳаракат мекард, дар наздикии деҳаи Жибек Жолии вилояти Акмолаи Қазоқистон вайрон шуд.
“Наҷотдиҳандагон ҳамаи мусофиронро аз сармо наҷот дода, ба ҷои гарм кӯчониданд. Мусофирон дар нуқтаи гармикунии ноҳияи Аршали ҷойгир карда шуда, пас аз таъмири автобусашон роҳи худро идома медиҳанд. Табибони ёрии таъҷилӣ ҳолати саломатии шаҳрвандонро мавриди муоина қарор доданд.”, омадааст дар хабари Кумитаи ҳолатҳои фавқулоддаи Қазоқистон.
Кумитаи ҳолатҳои фавқулоддаи ин кишвар ба тамоми мусофирон таъкид мекунад, ки мавсими зимистон мерасад ва пеш аз сафар баромадан эҳтиёткор бошанд ва вазъи обу ҳаворо санҷида, баъд ба роҳ бароянд.
Солона ҳазорҳо мусофир, бахусус шаҳрвнадони Тоҷикистон бо мошини сабукарв ё автобус тариқи Қазоқистон ба Русия мераванд. Ва мутаассифона, ҳолатҳои нохуши зиёд ҳам сабт шудааст, ки шаҳрвандони кишвар ё ба садама дучор гаштаанд ва ё дар сармои шадиди саҳроҳои тӯлонии ин кишвари паҳновар дармондаанд.
