Дар Вашингтон, рӯзи 6-уми ноябри соли 2025, президенти Иёлоти Муттаҳидаи Амрико Доналд Трамп ва президенти Тоҷикистон Эмомалӣ Раҳмон дар доираи Дувумин нишасти Осиёи Марказӣ ва Амрико (C5+1) бо ҳам мулоқот карданд.
Тарафҳо дар ин дидор омодагии худро барои таҳкими муносибатҳои дуҷониба ва васеъ кардани ҳамкориҳо дар бахшҳои иқтисод, сармоягузорӣ, энергетика, кишоварзӣ, нақлиёт, илм ва технология баён карданд.
Трамп Тоҷикистонро шарики боэътимод номид ва таъкид кард, ки ширкатҳои амрикоӣ дар лоиҳаҳои сармоягузории ин кишвар дастгирӣ хоҳанд шуд. Ӯ инчунин гуфт, ки ҳамкории ду кишвар дар соҳаҳои гуногун метавонад ба дастовардҳои назаррас бирасад ва равобити устуворро тақвият бахшад.
Президенти Тоҷикистон Эмомалӣ Раҳмон низ изҳор дошт, ки ҳамкории Тоҷикистон бо ИМА як самти муҳими сиёсати хориҷии кишвар аст ва Душанбе омода аст муколамаро дар ҳамаи соҳаҳои муҳим густариш диҳад. Ӯ афзуд, ки дар ҳоли ҳозир даҳҳо ширкат бо сармояи амрикоӣ дар Тоҷикистон фаъолият доранд, вале имконот барои ҳамкориҳои иловагӣ ҳанӯз зиёданд.
Дар ҷараёни мулоқот, роҳбарони ду кишвар инчунин масоили амниятӣ, аз ҷумла мубориза бо терроризм, пешгирӣ аз ифротгароӣ ва мубориза бо қочоқи маводи мухаддирро баррасӣ карданд.
Бояд гуфт қабл аз мулоқот бо раҳбарони кишварҳои Осиёи Марказӣ, аз ҷумла Эмомалӣ Раҳмон бо Доналд Трамп, мухолифони тоҷик ва чанд созмони ҳомии ҳуқуқи инсон аз раисҷумҳури Амрико Доналд Трамп хоста буданд, ки риояи ҳуқуқи инсон дар маркази гуфтугӯҳо худ қарор диҳанд.
