Директори Агентии авиатсияи граждании Тоҷикистон Ҳабибулло Назарзода бо муовини директори Идораи федералии авиатсияи ИМА Кристен Гатлин мулоқот кард.
Мулоқот 5-уми ноябри соли ҷорӣ дар Вашингтон дар арафаи саммити Осиёи Марказӣ ва Амрико сурат гирифта, ҷонибҳо масъалаи таҳкими ҳамкориҳои дуҷониба дар соҳаи авиатсияи гражданӣ, аз ҷумла таҳияи созишномаи байниҳукуматӣ “Оид ба алоқаи ҳавоӣ” ва бунёди парвозҳои мустақим байни Тоҷикистон ва Амрикоро баррасӣ кардаанд, аммо маълум нест, ки дар ин маврид ба натиҷае расидаанд ё на.
Ҳамзамон ҷонибҳо аз омодагии худ барои таҳкими заминаҳои ҳуқуқӣ ва техникӣ барои густариши муносибатҳои дуҷониба дар соҳаи авиатсияи гражданӣ гуфтаанд.
Дар ҳамин ҳол дар ҳошияи нишасти сарони кишварҳои ИМА ва ОМ, бо иштироки роҳбарони чанде аз вазорату идораҳо ва соҳибкорон аз Тоҷикистон ва намояндагони Конгрессу Вазорати тиҷорати ИМА, инчунин сардорони ширкатҳои маъруфи байналмилалӣ — Сити (Citi), Кока-Кола (Coca-Cola), Мета (Meta), Спейс Икс Старлинк (SpaceX/Starlink), Насдак (Nasdaq), Валмонт (Valmont), Эф Эл Смидт (FLSmidth), Донишгоҳи Невада ва ғайраҳо мизи мудаввар баргузор гардидааст.
Дар ин нишаст имкониятҳои нави ҷалби сармоя, густариши савдо ва татбиқи навгониҳо миёни давлатҳо баррасӣ шудааст. Ба иддаои расонаҳои ҳукуматӣ, соҳибкорони амрикоӣ ҳавасмандии худро барои густариши ҳамкорӣ бо Тоҷикистон ва татбиқи лоиҳаҳои муштарак дар соҳаҳои энергияи “сабз”, коркарди маъдан, истеҳсоли масолеҳи сохтмонӣ ва комплекси кишоварзӣ — саноатӣ иброз доштанд.
Ҳамчунин гуфта мешавад, дар натиҷаи кори мизи мудаввар байни ширкатҳои амрикоӣ ва соҳибкорони Тоҷикистону Амрико чанд созишнома ва ёддоштҳои ҳамкорӣ дар соҳаи нақлиёт, сармоягузорӣ, мубодилаи технологияҳо ва дигар бахшҳои иқтисод ба имзо расид.
Аз чумла, байни ширкати “Сомон Эйр”, ки моликаш Ҳасан Асадуллозода, додараруси Эмомалӣ Раҳмон дар ин нишаст ширкат дошт ва ширкати амрикоии “Боинг” шартномаи дарозмуҳлат барои хариди 14 ҳавопаймои муосир ба имзо расидааст.
Мувофиқи ин шартнома хариди то 4 ҳавопаймои Boeing 787-9 Dreamliner барои оғози хатсайрҳои байниқитъавӣ аз Душанбе ва хариди то 10 ҳавопаймои Boeing 737-8 (MAX) — барои навсозии парки ҳавопаймоҳо дар хатсайрҳои кӯтоҳ ва миёна ба нақша гирифта шудааст.
Ҷузъиёти дигаре аз ин шартнома расонаӣ нашудааст ва маълум нест ин ҳавопаймоҳо кай харидорӣ мешаванд.
