Дар маҳаллаи 65 (мкр)-и шаҳри Душанбе, шоми 9-уми ноябри соли ҷорӣ дар наздикии мактабҳои миёнаи №77 ва №78, як ҳодисаи маргбор миёни наврасон рух дод.
Ба иттилои расонаҳо, гурӯҳе аз хонандагони чанд мактаб дар натиҷаи муноқишаҳои лафзӣ ба занозании маргбор даст задаанд. Дар пайи ин даргирӣ як хонанда бар асари зарбаи корд ба ҳалокат расида, як нафари дигар сахт маҷруҳ шудааст.
Гуфта мешавад, наврасони захмиро ронандаи таксӣ, ки аз ҷойи ҳодиса мегузаштааст, дида, зуд ба беморхона бурдааст, аммо табибон натавонистаанд ӯро наҷот диҳанд. Ҷасади хонандаи дуюм бошад, субҳи як рӯзи баъд ёфт шудааст.
Ҳар ду қурбонӣ хонандагони синфи 10-и мактабҳои №78 ва №50-и шаҳри Душанбе будаанд. Наздикони онҳо ин хабарро ба сомонаи Your.tj тасдиқ кардаанд.
Мақомот аз рӯи ин ҳодиса парвандаи ҷиноятӣ боз намуда, тафтишот идома дорад. Ҳамзамон бо хонандагони мактабҳои зикршуда суҳбатҳои профилактикӣ бо иштироки намояндагони прокуратура ва мақомоти корҳои дохилӣ баргузор мешавад.
То ҳол ягон ниҳоди расмӣ дар ин бора ҷизе нагуфтааст. Ин нахустин бор ҳам нест, ки миёни хонандагони мактабҳо даргирӣ рух медиҳад. Дар гузашта низ расонаҳо аз чунин ҳодисаҳо хабар дода буданд, ки бархе аз онҳо бо марги наврасон анҷом ёфтааст.
Коршиносон сабаби чунин ҳолатҳоро дар беназорат мондани ҷавонон, носолим будани муҳити иҷтимоии онҳо ва беэътиноии масъулон дар кори тарбияи насли нав мебинанд.
Дар ҳамин ҳол, гурӯҳе дигар аз коршиносон дур шудани ҷавонон аз омӯзишҳои динӣ ва ахлоқиро яке аз сабабҳои афзоиши чунин рафторҳо мешуморанд. Ба гуфтаи онҳо, тарбияи дурусти маънавӣ ва ахлоқӣ метавонад нақши муҳим дар коҳиши бадрафторӣ ва хушунат миёни наврасон дошта бошад.
