Вазорати корҳои дохилии Тоҷикистон шоми 12-уми ноябр бо нашри як навори видеоӣ хабар дод, ки дар робита ба куштори чаҳор узви як оила дар ноҳияи Рӯдакӣ ду нафар боздошт шудаанд.
Вазорати корҳои дохилии Тоҷикистон навори гумонбари асосиро ифшо карда, аз ӯ Азимов Сайфулло Одинахӯҷаев номбурда ном ва ҷеҳраи нафари дувум, ки ноболиғ будааст, зикр нашудааст.
Ин ҷинояти ҳавлнок шаби 5 ба 6-уми сентябри соли 2025 дар ноҳияи Рудакӣ рух дод. Дар ин ҳодиса Шаҳло Назарова, зани 44-сола ва се фарзанди ноболиғаш бо номҳои Ҳабиба, Ҳамида ва Шараф ба сурати ваҳшатнок кушта шуданд. Падари хонадон Ҳалим Иброҳимов, дар замони рух додани ҳодиса дар муҳоҷират қарор дошт.
Ҳодиса рӯзи 8-уми сентябр дар ҳоле ошкор шуд, ки Ҳалим Иброҳимов вақте ҷанд бор ба ҳамсараш занг мезанад, аммо ҷавоб намегирад. Баъд ба яке аз ҳамсояҳо занг мезанад, то аз ҳоли ҳамасар ва фарзандонаш бохабар шавад. Вақте ҳамсоя вориди хона мешавад ҷасади қурбониёнро мебинад, ба падари хонавада ва полис хабар медиҳад.
ВКД мегӯяд, таҳқиқи қазия мураккаб буд ва муҳити зисту муносибатҳои хонавода мавриди таҳлил қарор гирифтанд. Ба иттилои манбаъ, ин ҷиноят ҷомеаро ба таҳлука андохта, овозаҳо ва гумонҳои зиёдеро дар шабакаҳои иҷтимоӣ ба бор овард.
Тибқи маълумоти расмӣ, омили асосии куштор майл ба молу мулк будааст. ВКД мегӯяд, Азимов Сайфулло ҳамсояи фавтидагон будааст Ӯ бо даъвати як ноболиғ ин ҷиноятро содир кардааст. Гуфта мешавад, парванда то ба ҳол ба додгоҳ ирсол нашудааст ва ҳанӯз ҳам тафтишот идома дорад.
