Шӯрои Амнияти Созмони Милали Муттаҳид шоми душанбе тарҳи пешниҳод намудаи Доналд Трамп, раисҷумҳури Амрико дар мавриди поён додани ҷанг дар Ғаззаро расман таъйид кард.
Аз 15 узви Шӯрои Амнияти СММ 13 раъй ба ҷонибдории қатънома овоз дода, 2 раъй – Русия ва Чин – бетараф овоз доданд, вале аз ҳаққи вето ҳам истифода накарданд.
Трамп дар ин тарҳи сулҳ барои Ғазза ба чанд нуктаи муҳиме ишора намудааст, ки аз ҷониби кишварҳои арабӣ ба хубӣ пазируфта шудааст. Аммо ҲАМОС инро рад кард. Ҳамзамон бо ҲАМОС, дигар гурӯҳҳои муқовимати фаластинӣ низ тарҳи Трампро рад карда, мегӯянд, ба бандҳои тарҳи қаблӣ иловаҳо ворид шуда, манофеи мардуми Фаластин ба инобат гирифта нашудааст.
Тарҳи пешниҳоднамудаи Трамп, ки Шӯрои Амният тасвиб кард, чанд бандеро дар бар мегирад, ки чорчӯби умумии идора ва амнияти Ғаззаро баъди таваққуфи ҷанг мушаххас мекунад. Аз ҷумла ташкили Шӯрои сулҳ ва нерӯҳои байналмилалии муваққатӣ дар ин борика аз бандҳои асосии ин тарҳи тасдиқшуда мебошанд.
Аз ҷумла дар тарҳи мазкур ин бандҳо зикр шудаанд:
. Таъсиси Шӯрои байналмилалии сулҳ, ҳамчун як ҳайати идоракунии интиқолӣ, ки азнавсозии Ғаззаро назорат мекунад.
. Омода сохтани пулиси фаластинӣ барои идораи Ғазза ва инчунин ободсозии Ғазза, ки тавонад роҳро барои ташкили давлати Фаластин дар оянда фароҳам кунад.
. Аз саргирии воридоти кумакҳои инсонӣ ба Ғазза дар ҳамоҳангӣ бо Шӯрои байналмилалии сулҳ. Шӯрои мазкур низ бе ҳамоҳангӣ бо Исроил ва Миср тасмимҳои худсарона гирифта наметавонад.
. Тамоми даромаду баромад ба Ғазза аз ҷониби Нерӯҳои байналмилалии сулҳ назорат мешавад.
. Барои барқарории сулҳу субот дар Ғазза силоҳ аз дасти ҲАМОС ва дигар гурӯҳҳои муқовимат гирифта мешавад ва пулиси фаластиние, ки бояд омода карда мешавад, барои ҷорӣ кардани тартибот дар Ғазза омода мешавад.
. Инчунин бо шуруи кори Шӯрои байналмилалӣ, артиши Исроил марҳила ба марҳила аз Ғазза хориҷ мешавад.
. Шӯрои байналмилалии сулҳ то 31-уми декабри соли 2027 фаъолият мекунад.
Ин ҳам дар ҳолест, ки Исроил ба хотири вуҷуди банди “ташкили давлати Фаластин дар оянда” эътироз намуда, мегӯяд, ба ин кор ба ҳеч ваҷҳ розӣ нахоҳад шуд. Ҳамзамон ҲАМОС мегӯяд, тағйироти ҷиддие ба ин тарҳ ворид шудааст, ки ба манфиати мардуми Фаластин нахоҳад буд.
