Давоми чанд рӯзи ахир дар Тоҷикистон гази моеъ, ки аксари мошинҳо ҳамчун сӯзишвории арзонтар истифода мекунанд, гарон шудааст.
Бархе ронандагон мегӯянд, нархи сӯзишвории газ қариб дар ҳамаҷо якбора гарон шуд ва аксари мошинҳо ба хотири арзон буданаш нисбат ба бензину сӯзишвории дизелӣ аз он истифода мекунанд. Аммо сокинон иллати гароншавии газро намедонанд.
Баъзе ронандагон дар шабакаҳои иҷтимоӣ навиштаанд, ки дар аксар нуқтаҳои фурӯши сӯзишворӣ гази моеъ ёфт намешавад ва агар бошад ҳам, 1 литри он аз 6 то 6,50 сомонӣ фурӯхта мешавад. Дар ҳоле, ки то чанд рӯзи қабл як литр гази моеъ дар нуқтаҳои сӯзишворӣ то 4,2 сомонӣ фурӯхта мешуд.
Дар дар нуқтаҳои фурӯши сӯзишворӣ сабаби гарон шудани гази моеъро дар кишвар ба кам ворид шудани он аз Қазоқистон рабт медиҳанд.
Хабаргузории “Азия-Плюс” низ иттилоъ дод, ки аз Вазорати энергетика ва захираҳои оби кишвар ба ин расона тасдиқ кардаанд, ки гароншавии гази моеъ ба коҳиши воридоти он аз Қазоқистон аст, зеро ин кишвар дар содироти гази моеъ маҳдудият ҷорӣ кардааст.
Ин ҳам дар ҳолест, ки ҳафтаи қабл иҷрокунундаи вазифаи вазири энергетикаи Қазоқистон бо судури фармоне аз 14-уми ноябри соли ҷорӣ содироти гази моеъ ба воситаи мошинҳои боркаш ва ё роҳи оҳанро то 6 моҳ манъ кард. Сабаби ин маҳдудсозиро “оғози таъмир дар иншооти зерсохтори роҳи оҳани Қазоқистон” гуфтаанд.
Инчунин аз Вазорати энергетикаи кишвар ба ин расона гуфтаанд, ки сабаби дигари коҳиши гази моеъ дар нуқтаҳои сӯзишвории ҷумҳурӣ ва гарон шудани нархи он, ба масоили логистикӣ низ рабт дорад.
Гази моеъ дар Тоҷикистон ба сабаби арзон будан нисбат ба бензину сӯзишвории дизелӣ арзонтар аст ва аз ин ҳисоб дар кишвар аксари мошинҳои сабукрав аз он ситифода мекунанд. Гази моеъ ба Тоҷикистон одатан аз кишварҳои Русия ва Қазоқистон ворид мешавад.
Ба назари таҳлилгарон, агар гароншавии ин навъи сӯзишворӣ бештар ба воридоту мушкилоти аз кишвари содиркунанда бошад, вале боз инҳисори ин тиҷорат дар дасти чанд нафар аз наздикони раисҷумҳур Эмомалӣ Раҳмон низ рақобатро дар ин бозор камтар мекунад ва нарх ҳамеша тағйир меёбад.
