Аз роҳҳои пойтахт гузаштан хеле душвор аст, чаро масъулони роҳсозӣ дар Душанбе шароити маъбонро ба назар нагирифтаанд? Ин суолест, ки бархе маъюбон мепурсанд.
Лайло Мамадёрова, шаҳрванди Тоҷикистон ва маъюбе, ки аз аробачаи маъюбӣ истифода мебарад, дар як навори видеоӣ аз бадрафтории кормандони Бозрасии давлатии автомобилии кишвар (БДА) шикоят кардааст. Ба гуфтаи ӯ, кормандони БДА ба ӯ монеа эҷод кардаанд ва дар натиҷа натавонистааст ба автобуси худ сари вақт бирасад.
Сабаби дақиқи монеа шудани ҳаракати ӯ аз тарафи кормандони БДА маълум нест. Аммо худи ӯ мегӯяд, ки барои расидан ба автобус талош дошт, вале роҳ барои гузаштани аробачаи маъюбӣ ноҳамвор буд ва дигар роҳе барои гузаштан надошт, ӯ маҷбур шуда дигар роҳро интихоб кунад, вале кормандони БДА на танҳо монеа шуданд, балки бадрафторӣ ва ҳатто дашному таҳқир ҳам карданд. Ӯ мегӯяд, тамоми ҳодисаро дар видео сабт мекард, вале кормандони давлатӣ телефонашро бо зӯр аз дасташ кашида гирифтаанд ва наворҳои сабтшударо пок карданд.
Лайло Мамадёрова таъкид мекунад, ки ин аввалин ҳолати рафтори бад ва таҳқиру беэҳтиромӣ аз ҷониби кормандони давлатӣ нисбат ба ӯ нест. Ба гуфтаи ӯ, кормандон давллатӣ нисбати вай ҳатто аз калимаи ҳақоратомези “лаънатӣ” истифода карданд.
Хонум Мамадёрова мегӯяд, ки дар шаҳри Душанбе барои шахсони дорои маълулият, махсусан касоне, ки бо аробачаи маъюбӣ ҳаракат мекунанд, шароити зарурӣ фароҳам нест. Борҳо аз тарафи ин қишри ҷомеа шикоят шудааст, ки “дар раванди сохтмон ва тарҳрезии шаҳр, биноҳо, идораҳои давлатӣ ва иншооти иҷтимоӣ шароити маъюбон ба назар гирифта намешавад”, ки ин барои ҳаракат ва зиндагии онҳо монеаҳои ҷиддӣ эҷод мекунад.
Ҳодиса дар ҳолест, ки солҳои ахир сокинони дорои маълулият борҳо аз набудани шароити мувофиқ дар шаҳрҳои калон, аз ҷумла Душанбе, шикоят кардаанд. Баръакси кишварҳои пешрафтаи дунё, ки дар ҷойҳои ҷамъиятӣ биноҳои давлатӣ, мағозаҳо, истгоҳҳои автобус ва метро имкониятҳои мусоид барои шахсони маъюб муҳайё аст.
Аммо дар робита ба бадзабонии пулис дар шаҳри Душанбе ин бори аввал нест, ки шикоят мешавад. Борҳо шикоят мешавад, ки маъмурони БДА ва КДАМ бо шаҳрвандон аз нигоҳи касбӣ рафтор намекунанд ва хеле дағалона муносибат доранд. Вале Рамазон Раҳимзода, раҳбари Вазорати корҳои дохилӣ иддао мекунад, ки кормандонаш бо мардум рафтори хуб доранд.
