Вазорати корҳои дохилӣ дар шаҳри Душанбе 5 шаҳрвнадро бо иттиҳоми фурӯши ғайриқонунии маҳсулоти тамоку ба ноболиғон дастгир кардааст.
Гуфта мешавад, боздошти афроди гумонбар аз ҷониби маъмурони Шуъбаи мубориза бар зидди гардиши ғайриқонунии воситаҳои нашъадори Раёсати ВКД дар шаҳри Душанбе сурат гирифтааст.
Вазорат аз боздоштшудаҳо, Комилхонзода Суҳайбулло, Чутаков Аҳмадҷон, Соҳибназари Абдуалим, Назаров Икромбой ва Гулов Қосимҷон ном бурдааст. Гуфта мешавад, онҳо чилим (қалён) ва сигорҳои электрониро “дидаву дониста бо мақсади манфиати молиявӣ” чунин маҳсулоти зарароварро ба ноболиғон фурӯхтаанд.
Вазорати корҳои дохилӣ нисбати ин афрод тибқи моддаи 463 қисми 2-и Кодекси ҳуқуқвайронкунии маъмурии Ҷумҳурии Тоҷикистон протокол тартиб дода, нисбаташон ҷазоҳои маъмурӣ дар шакли ҷарима татбиқ шудааст.
Мақомот аз шаҳрвандон даъват мекунад, ки назорати фарзандони худро ҷиддитар кунанд ва барои пешгирии истифода ва фурӯши чунин маҳсулоти зараровар бо милитсияи пойтахт ҳамкорӣ намоянд.
Чанде қабл низ Вазорати корҳои дохилӣ аз боздошти як гурӯҳ хонандагони мактаби миёна хабар дода буд, ки дар дохили муассисаҳои таълимӣ ба кашидани сигорҳои электронӣ ва чилим машғул будаанд.
Шахсони огоҳ мегӯянд, ки ахлоқи ҷавонон дар мактабҳои миёнаи Тоҷикистон, махсусан дар Душанбе то рафт бадтар мешавад. Ба гуфтаи онҳо, истифодаи сигор, чилим ва ҳатто маводи мухаддир миёни наврасон маъмул шудааст. Ин ҳолат, нишон медиҳад, ки фаъолияти Вазорати маориф ва илми кишвар дар самти тарбияи ахлоқии хонандагон нокифоя буда, масъулон натавонистаанд пеши роҳи ин буҳрони ахлоқиро бигиранд.
