Мақомдорони Толибон дар мулоқотҳояшон аз ҳайати Тоҷикистон хостаанд, ки Душанбе ҳукумати ин гурӯҳи ҳоким дар Афғонистонро ба расмият шиносад. Дар ин бора шабакаи телевизионии “Ому” дар истинод ба манобеаш хабар додааст.
Бино ба иттилои манбаъ, Толибон ҳамчунин аз ин ҳайат, ки дар Кобул қарор дошт, талаби вогузор кардани сафорати Афғонистон дар Душанберо ба намояндаашон кардаанд. Аммо ҳайати Тоҷикистон то кунун ба ин дархостҳои Толибон посухи дақиқе надодаанд.
Ҳоло танҳо консулгарии Афғонистон дар Хоруғ зери идораи намояндаи Толибон аст.
Гуфта мешавал, ҳайати иборат аз 14 нафар мақомдори тоҷик, рӯзи 15-уми ноябр вориди Кобул шуда, бо раиси вазирон, вазири дифоъ, вазири корҳои хориҷӣ, раиси ситоди артиш, вазири сарҳадот ва вазири истихбороти ҳукумати Толибон мулоқот кардааст.
Ба навиштаи расонаҳои афғонӣ, дар ин мулоқотҳо ҷонибҳо бештар масъалаи ивази зиндониён, амнияти марзҳо, мубориза бо қочоқи маводи мухаддир ва гурӯҳҳои террористӣ, афзоиши ҳамкориҳои иқтисодӣ ва ғайраро баррасӣ кардаанд.
То ҳол ҷониби Тоҷикистон ва расонаҳои наздик ба ҳукумати кишвар дар бораи сафари ин ҳайат ба Кобул ва аз ҳадафи мулоқот бо мақомдорони Толибон чизе нагуфтаанд.
Ва хомӯшии ҷониби ҳукумати кишвар ҳам дар ҳолест, ки Тоҷикистон ягона кишвар дар Осиёи Марказӣ аст, ки ба таври расмӣ мегӯяд, бо Толибон равобити мустақим надораду сафорати Афғонистонро ба Толибон насупурдааст ва борҳо аз ҳукумати Толибон интиқод ҳам карда буд.
