Вазорати молияи Тоҷикистон навтарин омори худ дар бораи ҷарима ва муҷозотро барои нуҳ моҳи соли ҷорӣ нашр кард.
Тибқи ин маълумоти расмӣ, дар давоми нуҳ моҳи гузашта аз ҳисоби ҷаримаҳо ба буҷети давлат 415 миллион сомонӣ ворид гардидааст. Гуфта мешавад, танҳо аз ин манбаъ ҳар рӯз ҳудуди 1,5 миллион сомонӣ ба буҷети кишвар ворид мешавад. Манбаъ ҳамчунин хабар медиҳад, ки иҷро нақшаи даромад аз ҳисоби ҷаримаҳо ба 147,7% расидааст.
Бар асоси додаҳои Вазорати молия, ҳаҷми умумии ин даромадҳо нисбат ба ҳамин давраи соли гузашта 88 миллион сомонӣ зиёд мебошад. Дар соли 2024 аз ҳисоби ҷаримаҳо 327,3 миллион сомонӣ ва дар нуҳ моҳи соли 2023 бошад 244,3 миллион сомонӣ ба буҷет ворид шуда буд.
Ин дар ҳолест, ки шаҳрвандон борҳо аз ҷаримаҳои сангин ва дар бисёр мавридҳо беасос шикоят мекунанд. Бисёре аз онҳо мегӯянд, ки бо баҳонаҳои гуногун ҷарима мешаванд ва имкони дифои ҳуқуқии худро надоранд.
Коршиносон таъкид мекунанд, ки вазъи молии қисми зиёди аҳолии кишвар хуб нест, садҳо ҳазор шаҳрванд дар муҳоҷирати корӣ қарор доранд, то тавонанд хароҷоти оилаи худро таъмин кунанд. Дар баробари ин, нархи маҳсулоти хӯрока, маводи ниёзи аввал ва хидматрасониҳо пайваста гарон мешавад, ки фишори иқтисодиро болои мардум боз ҳам зиёд мекунад.
Дар чунин шароит, ба қавли таҳлилгарон, ҷарима бастан ба шаҳрвандон ҳатто бо баҳонаҳои ночиз боиси нигаронӣ шудааст. Онҳо мегӯянд, ин ҷаримабандии густурда ба яке аз воситаҳои пур кардани буҷети давлат табдил ёфтааст, дар ҳоле, ки вазъи иҷтимоиву иқтисодии мардум торафт душвортар мешавад.
