Шаби 1-уми декабри соли ҷорӣ дар шаҳри Жешови Лаҳистон як шаҳрванди Тоҷикистон бар асари тасодуф ҷон бохт.
Ба гузориши расонаҳои лаҳистонӣ, шаби 30-уми ноябр соати 23:00 се шаҳрванди Тоҷикистон, ки савори як мошини “Мерседес” буданд, дар кӯчаи Langiewicza-и шаҳри Жешов бо суръати баланд ба як дарахт бархӯрданд. Яке аз сарнишинон дар ҷои ҳодиса фавтида, ҳолати ду шаҳрванди дигари Тоҷикистон вазнин гузориш дода мешавад.
Бино ба иттилои пулиси шаҳри Жешов, ронандаи “Мерседес” як ҷавони 20-солаи шаҳрванди Тоҷикистон буда, дар ҳолати мастӣ ронандагӣ мекардааст. Тибқи хабарҳои тасдиқнашуда, ҳарсеи ин ҷавонон донишҷӯёни яке аз донишкадаҳои хусусии Жешов будаанд. Пулис мегӯяд, ронандаи ҷавонро барои дар ҳолати мастӣ ронандагӣ кардан аз 20 сол то ҳабси абад таҳдид мекунад.
Пулиси Лаҳистон аз ин шаҳрвнадони Тоҷикистон ном набурдааст ва ҳувияти онҳо маълум нест. Ҳамзамон касе аз наздикони онҳо ба расонаҳо чизе нагуфтааст.
