Кремл рӯзи чоршанбе, 3-юми декабр эълон кард, ки Владимир Путин, раисҷумҳури Русия баъзе аз пешниҳодоти Амрикоро дар мавриди поён додани ҷанг дар Украина пазируфтааст.
Хабаргузории “Ройтерз” имрӯз гузориш дод, ки Русия омодааст барои расидан ба тавофуқ бо музокиракунандагони амрикоӣ дидор кунад.
Дмитри Песков, сухангӯи Кремл ба расонаҳо гуфта, ки пас аз музокироти тӯлонӣ дар Маскав байни Путин ва Стив Ветков, фиристодаи вежаи Доналд Трамп, раисҷумҳури Амрико ва инчунин домодаш ҳнӯз ба натиҷаи ниҳоӣ даст наёфтаанд.
Песков афзуда, ки дирӯз барои аввалин бор байни Путин ва фиристодаи Амрико гуфтугӯи мустақим сурат гирифт, бархе пешниҳодоти Трамп бари поён додани ҷанг бо Украина аз ҷониби Путин пазируфта шуд ва баъзе дигар ғайри қобили қабул дониста шуд. Ӯ ин равандро “бахши табии ёфтани роҳҳалҳо” донистааст.
Ҳамзамон сухангӯи Кремл таъкид карда, ки Русия аз талошҳои Трамп қадрдонӣ мекунад, аммо Маскав ба таври мудовим аз раванди музокирот гузориш нахоҳад дод.
Ёдовар мешавем, ки Доналд Трамп моҳи ноябр як маҷмуаи пешниҳодот иборат аз 28 бандро барои сулҳи Русия ва Украина ироа карда буд, ки мақомҳои украинӣ ва аврупоӣ онро “нигаронкунанда” хонда, гуфтанд, ин пешниҳодот бо хостаи Маскав мутобиқат дорад ва хостаҳои Украина ва Аврупо ба назар гирифта нашудааст.
