Вазорати корҳои дохилии Тоҷикистон хабар медиҳад, ки чанде аз фарзандони чеҳраҳои шинохтаи Тоҷикистон аз марказҳои дилхушии пойтахт боздошт шуданд.
Бино ба маълумоти Раёсати ВКД дар шаҳри Душанбе, 7-уми декабр чанд ҷавон, аз ҷумла писарони шахсони шинохта, барои дағалона вайрон кардани тартиботи ҷамъиятӣ дар маркази дилхушии “Dream” боздошт гардиданд.
Дар миёни боздоштшудагон Сироҷов Шердил (писари молики собиқи маҷмааи “Ҷал Ҷам”), Аюбов Ҷовидон (писари овозхони шинохта Зафар Аюбӣ), Алиев Мануҷеҳр ва Ҳабибов Муқимҷон номбар мешаванд. Ба иттилои Радиои Озодӣ, як нафари дигар писари як тоҷири маъруф низ боздошт шудааст, аммо номаш зикр нашудааст.
Гуфта мешавад, ки ин афрод ба сабаби муноқиша ва фанҷол боздошт шудаанд ва муноқишаи онҳо дар дохили маркази дихушии “Dream” оромии ҷамъиятиро халалдор карда, нороҳатии дигар шаҳрвандонро ба миён овардааст. Тибқи маълумоти мақомот, Сироҷов Шердил қаблан низ дар чунин қазияҳо даст доштааст.
Додгоҳ барои Шердил Сироҷов 10 шабонарӯз ва барои дигарон 5 шабонарӯз ҳабси маъмурӣ таъин кардааст. Ҳамзамон, маводҳо барои оғоз кардани парвандаи ҷиноятӣ низ омода шуда, тафтишоти пешакӣ идома дорад.
Ин ҳодиса бори дигар масъалаи рафтори баъзе фарзандони шахсиятҳои маъруфро зери суол мебарад. Ин бори аввал нест, ки писарони шахсиятҳои маъруф ва ҷеҳраҳои сиёсӣ ва ҷамъиятӣ дар сархати расонаҳо қарор мегирад.
Ба бовари мардум, аксари фарзандони шахсиятҳо маъруф аз доштани пул ва шуҳрат волидайнашон суистифода карда, дар ҷомеа даст ба бетартибӣ мезананд.
