Баъзе аз корбарон дар шабакаҳои иҷтимоӣ аз гарон шудани нархи гӯшт дар мағозаҳои пойтахт шикоят мекунанд.
Корбарон дар шабакаҳои иҷтимоии Фейсбук навиштаанд, ки дар мағозаи “Пайкар” як килои гӯшти лаҳм 219,90 сомонӣ (ҳудуди 31 доллари амрикоӣ) нархгузорӣ шудааст.
Корбарони зиёде ба ин нархи гӯшт вокуниш нишон дода, мепурсанд, ки чаро мақомот нархи гӯштро дар мағозаҳои бузург назорат намекунад. Аз ҷумла, як корбар бо номи Иззатманд Салмониён менависад: “Гӯштфурӯшонро ку барои нархи баланд ҷарима ё танбеҳ медиҳанд, соҳибони мағозаҳо гӯштро аз куҷо мегирифта бошанд ва оё онҳо ҳам масъул ҳастанд?”
Корбарони дигаре низ ҷонибдори ин гаронкунӣ ҳастанд ва дар посух ба ин навишта мегӯянд: “Пул надорӣ нахар, ҳастанд одамони гӯштхар.”
Бархе дигар боварашон намеяд аз ин нархи баланд ва мепурсанд, ки шояд ин нархи умумии гӯшти бурида ва ҷудокарда бошад, ки вазнаш аз ду кило бештар аст. Вале корбарони дигар ба ин шубҳаҳо посух дода, мегӯянд: “Навиштаҷотро бубинед, нарх барои як кило навишта шудааст.”
Ин гуна гарон шудани гӯшт дар бозорҳои пойтахт аҳолиро нигарон кардааст. Дар ҳоле ки то имрӯз нархи гӯшти устухондор дар бозорҳои кишвар аз 90 то 115 ва гӯшти лаҳм то 145 сомонӣ арзиш дошт.
Мақомоти додситонӣ ва пулиси шаҳри Душанбе охири моҳи ноябр дар бозорҳои бузурги пойтахт, аз ҷумла бозори “Фаровон”, “Меҳргон”, “Саховат” ва ғайра санҷиш гузаронида, тақрибан 120 гӯштфурӯшро аз 3500 сомонӣ то 7500 сомонӣ ҷарима карда буданд. Ҳамзамон дар ҳамин санҷиш 5-6 қассоби дигарро, ки ба гӯштфурӯшӣ машғул буданд, маҳз бо иттиҳомӣ “гаронфурӯшӣ” 5-рӯзӣ ба зиндон андохтанд.
