Ширкатҳои “Apple” ва “Google” ба корбаронашон дар чанд кишвар, аз ҷумла Тоҷикистон, огоҳинома дар бораи хатари ҳамлаҳои ҳадафмандонаи киберӣ фиристодаанд.
Хабаргузории “Ройтерз” навишта, ки ширкати Apple огоҳиномаро рӯзи 2-уми декабр ба корбаронаш дар 150 кишвари дунё фиристодааст, аммо ин ширкат на шумораи корбарони мавридиди ҳадаф қароргирифтаро эълон кардаасту на аз ташкилкунандагони эҳтимолии ҳамлаҳои хакерӣ ном бурдааст.
Дар ҳамин ҳол ширкати “Google” бо нашри изҳороте гуфта, ки ҳамлаҳои хакерӣ бо истифода аз нармафзори ҷосусии “Intellexa” анҷом дода шудаанд ва садҳо ҳисоб дар кишварҳои гуногун, аз ҷумла Покистон, Қазоқистон, Ангола, Миср, Узбекистон, Арабистони Саудӣ ва Тоҷикистон зери ҳадаф қарор гирифтаанд.
Google таъкид кардааст, ки “Intellexa” — гурӯҳи хусусии тиҷоратӣ дар соҳаи киберҷосусӣ буда, новобаста аз таҳримҳои ИМА “маҳдудиятҳоро давр зада, фаъолияташро идома дода истодааст.”
“Intellexa” соли 2019 аз ҷониби Тал Дилин, собиқ афсари истихбороти низомии Исроил таъсис ёфта, ба таҳияи абзорҳои пайгирӣ ва вуруди махфӣ ба дастгоҳҳо машғул аст.
Маҳсули аз ҳама маъруфи ин гурӯҳ “Predator” – нармафзори ҷосусиест, ки ба ҳамлагарон имкон медиҳад назорати пурра бар дастгоҳи қурбониро ба даст оранд ва он тавассути пайвандакҳои зараровар ё ҳатто рекламаи онлайн насб мешавад.
Вақте “Predator” дар дастгоҳ насб мешавад, он ба ба мессенҷерҳо, аз ҷумла WhatsApp ва Signal дастрасӣ пайдо карда, камера ва микрофони телефонро идора карда метаваонад. Ҳамчунин ин нарафзор ҷойро муайян карда, метавонад маълумотҳоро аз ҳофиза ва паролҳоро низ ба даст орад.
Мутахассисони соҳа барои бо ин мушкил рӯ ба рӯ нашудан ба корбарон тавсия медиҳанд, ки ҳамеша версияи “OS” ва барномаҳои дастгоҳҳои худро навсозӣ намуда, аз пайвандакҳо ношинос ва рекламаҳои онлайнӣн дурӣ ҷӯянд ва ҳамзамон аз ҳимояи “2FA” истифода баранд.
Гуфта мешавад, ки ҳамлаҳои ҳадафмандонаи хакерӣ бо истифода аз “Predator” дар гузашта бештар нисбати рӯзноманигорон, фаъолони ҷамъиятӣ, сиёсатмадорон ва соҳибкорон сурат гирифта буд, вале ҳоло корбарони оддӣ низ метавонанд дар минтақаи хатар қарор гиранд.
