Раёсати Вазорати корҳои дохилӣ дар шаҳри Душанбе аз боздошти ду ҷавоне хабар дод, ки бо пӯшидани либоси пулис худро ҳамчун кормандони мақомоти бозрасӣ муаррифӣ намуда, аз шаҳрвандон маблағҳои зиёд мегирифтаанд.
ШВКД-1 дар ноҳияи Сино аз боздоштшудагон Шарифзода Абдуҷаббор ва Ҷурахонов Ҷумахон ном бурда, мегӯяд, онҳо дар пайи санҷиши муроҷиатҳои шаҳрвандон ва гузаронидани чорабиниҳои оперативӣ-ҷустуҷӯӣ дастгир шудаанд.
Бар асоси маълумоти пешакии тафтишот, гумонбарон бо роҳи фиреб ва суистифода аз боварии шаҳрвандон маблағҳои пулӣ ба даст овардаанд. Мақомот мегӯянд, чунин амалҳо “обрӯ ва эътимоди ҷомеаро нисбат ба мақомоти ҳифзи ҳуқуқ коста мегардонанд”.
ВКД мегӯяд, барои оғоз намудани парвандаи ҷиноятӣ маводҳои зарурӣ тартиб дода шуда, айни замон нисбати онҳо тафтишоти пешакӣ ҷараён дорад.
Дар пайи боздошти гумонбарон, мақомоти ҳифзи ҳуқуқ аз шаҳрвандон хостаанд, ки “агар мавриди фиреби ин ду нафар қарор гирифта бошанд ё маълумоти иловагӣ дошта бошанд”, ба мақомоти пулис муроҷиат намоянд.
Коршиносон ва мунтақидон бар ин назаранд, ки афзоиши ҳолатҳои бардурӯғ худро мансабдор, бахусус корманди пулис ва нозирони роҳ ё кормандони мақомоти амниятӣ муаррифӣ кардан, худ нишонаи амиқи фасоди густурда дар ин ниҳодҳост. Ба гуфтаи онҳо, вақте одамон медонанд, ки дар баъзе бахшҳои сохторҳои қудратӣ “пораситонӣ бо баҳонаҳои гуногун” ба як амали маъмул табдил ёфтааст, баъзе ашхоси тамаъҷӯ низ аз ин вазъият сӯистифода карда, худро корманди давлатӣ нишон медиҳанд, то пули муфт ба даст оваранд.
Ин гурӯҳи мунтақидон таъкид мекунанд, ки чунин қазияҳо ҳушдорест барои мақомоти масъул, то мубориза бо фасод ва назорати доимӣ дар ниҳодҳои қудратиро шиддат бахшанд ва роҳро ба чунин сӯистифодаҳои хатарнок бубанданд.
