Кишварҳои Тоҷикистон, Узбекистон ва Қирғизистон тасмим доранд иқтидори шабакаҳои барқи байнидавлатиро афзоиш диҳанд.
Гуфта мешавад, ин иқдом барои устувории низоми энергетикии минтақа аҳамияти стратегии дорад ва он дар манотиқи сарҳадӣ ва дар чорчӯби барномаи REMIT, ки аз ҷониби Бонки ҷаҳонӣ дастгирии молиявӣ ва техникӣ пайдо кардааст, пеш бурда мешавад.
Дар бораи ҷузъиёти ин лоиҳа вазири нерӯи Қирғизистон Таалайбек Ибраев дар суҳбат бо телевизиони “O’zbekiston 24” тавзеҳот додааст. Ибраев тасдиқ намуда, ки корҳои таҳкими хати интиқоли барқ байни се кишвар аллакай идома доранд. Ин барои он зарур аст, ки “ҳалқаи энергетикии” минтақа бо қувваҳои нави тавлидӣ, ки баъди ба кор даромадани иншооти нав ба вуҷуд меоянд, мубодилаи устувор дошта тавонад.
Феълан интиқоли мунтазами захираҳои энергетикӣ байни кишварҳо ба роҳ монда шудааст, ҳамчунин транзити барқ низ анҷом мегирад, ки ин имкон медиҳад дар мавсими камбудӣ интиқоли барқ танзим карда шавад.
Ин дар ҳолест, ки тавлиди барқ ҳоло дар дохили Тоҷикистон ба як мушкилии асосӣ тадил ёфта, мардум аз бебарқӣ сахт ранҷ мебаранд. Ҳоло дар як шабонарӯз ба аҳолии Тоҷикистон аз 2 то 4 соат барқ дода мешавад.
Мақомот сабаби ин маҳдудияти сахтро агарчи ба “камшавии обанборҳо” ва “набудани боришот” рабт медиҳанд, вале ба гуфтаи таҳлилгарон, мақомот на ҳамаи чизро дар ин бора бо сароҳат ба мардум мегӯяд. Сокинон бар ин назаранд, ки Тоҷикистон захираи лозимии барқи худро дорад, вале доираҳои хоссе ҳастанд, ки аз фурӯш ва интиқоли барқ ба кишварҳои ҳамсоя кисаҳои худро пур мекунанд.
