Муассисаи давлатии “Тоҷикфилм” тасмим гирифта, ки филми синамоие бар пояи асари “Шоҳнома”-и Абулқосим Фирдавсӣ ба навор гирад.
Тавре раҳбари муассисаи давлатии “Тоҷикфилм” Маҳмадсаид Шоҳиён эълон кардааст, ниҳоди зери роҳбарияш тасмим дорад барои нашри боз ҳам бештари асари “Шоҳнома”-и Ҳаким Абулқосим Фирдавсӣ онро ба навор гирад. Ва дар ин замина гуфтугӯҳоеро бо ҳамкорони эронияш оғоз кардааст.
Бино ба иттилои расонаҳои эронӣ, ҳадаф аз нашри ин асар ба сурати филми синамоӣ аз ҷониби “Тоҷикфилм” ва дар ҳамкорӣ бо ҳамтоёни эронӣ, бозтоби муштаракоти фарҳангӣ, забонӣ ва торихӣ миёни мардуми Тоҷикистон ва Эрон ва минтақаи тамаддуни Хуросон унвон шудааст.
Шоҳиён ба навор гирифтани филми мавриди назарро “муассиртар” ва “абзори неруманд” барои шиносондани миллат ба торих ва тамаддуни худ дониста, таъкид мекунад, ки он низ метавонад муаррифгари решаҳои муштараки тамаддунӣ миёни миллатҳои порсизабон бошад.
Ба навор гирифтани филме бар пояи асари “Шоҳнома” дар ҳолест, ки пажӯҳишгар ва олими тоҷик Абдуллоҳ Шерзод дар саҳфаи фейсбукияш пешниҳод карда, ки мардум дар ин замон бештар ба телефон дастрасӣ доранд ва бояд ин китоб ба шакли PDF ва ройгон мунташир шавад, то барои ҳама дастрас шавад.
Ин донишманди тоҷик бо интиқод аз мақомоти кишвар мегӯяд: “Ин довуду дастгоҳи маориф магар аз асри ХХ берун наомадаанд ва намекдонанд, ки шуури килипӣ – фушурда доранд. Масъулони нашру пахши “Шоҳнома” андеша кунед мардум ин ду ҷилди калонро мардум дар куҷо ва дар кадом ҳолат хонанд?”
Ба гуфтаи коршиносон, ҳадаф аз нашри “Шоҳнома” агарчи хуб аст ва миллатро ба асли худ шиносондан бошад ҳам, вале талоши мақомот барои муаррифии ҳувият набояд бо нашри як-ду китобу асари синамоӣ хулоса шавад. Ба назари онҳо, марудм китоб дорад, вале мушкилоти зиёди дигаре дорад, ки ба хондани китоб вақт ҳам пайдо намекунад. Ҳукумат бояд шароити иқтисодиро барои мардум фароҳам кунад, то аҳолӣ ба хотири осуда ҳам кор кунад ва ҳам фурсате барои китоб хондан дошта бошад.
