Эмомалӣ Раҳмон, раисҷумҳури худкомаи Тоҷикистон 21-уми декабри соли ҷорӣ, яъне пас аз 5 рӯзи қатли Қобилҷон Алиеви 10-сола ба Русия рафт.
Ӯ ба Русия барои иштирок дар вохӯрии ғайрирасмии сарони кишварҳои узви Иттиҳоди Давлатҳои Мустақил, ки дар шаҳри Санкт-Петербург баргузор мешавад, сафар кардааст, на барои кушта шудани Қобилҷон Алиев.
Гуфта мешавад, ин вохӯрӣ имрӯз, 22-уми декабр баргузор гардид ва дар он сарони кишварҳои ИДМ маҷмуи масоили ҳамкории байнидавлатӣ дар соҳаҳои тиҷоратию иқтисодӣ, иҷтимоӣ ва фарҳангию башарӣ, ҳамчунин таъмини амнияти минтақавиро баррасӣ кардаанд.
Як рӯз пеш аз вохӯрии ғайрирасмии сарони кишварҳои узви ИДМ ба Эмомалӣ Раҳмон, Шавкат Мирзиёев ва Содир Ҷабборов ҷоизаи байналмилалии сулҳ ба номи Лев Толстой супорида шуд. Сарони Тоҷикистон, Қирғизистон ва Узбекистон “барои саҳми бузург дар таҳкими сулҳ ва амният дар минтақа моҳи сентяри соли 2025” , яъне барои ҳалли масоили марзӣ байни Тоҷикистону Қирғизистон ба ин ҷоиза сазовор гардиданд.
Аммо маълум нест, ки Эмомалӣ Раҳмон дар ҷараёни нишаст ва ё вохӯриҳои ҳошиявӣ қатли навраси тоҷик ва мушкили нафратпароканӣ ба муҳоҷирони тоҷикро дар Русияро бо Владимир Путин дар миён гузоштааст ё не.
Бояд гуфт, ин сафари Раҳмонов ба Русия, ҷоиза гирифтанаш дар ин шабу рӯз ва хомӯшияш дар қазияи Қобилҷон, норозигиро миёни ҷомеаи Тоҷикистон ба бор овардааст. Чун, ба гуфтаи корбарони шабакаҳои иҷтимоӣ, раисҷумҳур ҳам метавонист дар ин шабу рӯз хомӯш набошад ва дар баробари ҳазорҳо зодагони Тоҷикистон ва ҳатто кишварҳои Осиёи Марказиву ҷаҳон ҳадди ақал ҳамдардӣ баён кунаду ҳодисаи қатли бераҳмонаи Қобилҷонро аз дасти як миллатгарои рус маҳкум кунад ва дар ҳошияи ин сафараш онро ба Путин матраҳ кунад.
