Дар Тоҷикистон нисбат ба амалҳои фолбинӣ ва ҷодугарӣ қавонини сахтгиронатаре ҷорӣ мекунанд.
Қонунгузорони кишвар қарор қабул карданд, ки на танҳо худи фолбинҳо, балки онҳое ҳам, ки ба ин гурӯҳ муроҷиат мекунанд, мавриди бозхост қарор мегиранд.
Пас аз тасвиби тағйирот ба Кодекси ҷиноӣ дар Маҷлиси миллӣ, акнун ҳар шахсе, ки ба назди фолбин ё ҷодугар меравад, метавонад ба ҷаримаи чандҳазорсомонӣ рӯ ба рӯ шавад. Ин ҷарима аз 50 то 60 нишондиҳанда барои ҳисобҳо муайян гардида, маблағи он то 4500 сомониро ташкил медиҳад.
Ба гуфтаи намояндагони Маҷлиси миллӣ, аз ҷумла Маҳмадалӣ Ватанзода, ҳадафи асосии ин иқдом маҳдуд кардани паҳншавии хурофот ва пешгирии таъсиргузории андешаҳои ифротӣ дар ҷомеа аст. Ба андешаи мақомот, фолбинӣ танҳо як “хидмати шахсӣ” нест, балки падидаест, ки метавонад ба шуури ҷамъиятӣ таъсири манфӣ расонад.
Ин қарор қаблан дар палатаи поёнии порлумон пазируфта шуда буд ва пас аз имзои раисҷумҳур қувваи қонунӣ мегирад. Бо ин роҳ, муборизаи давлат алайҳи фолбинӣ расман шакли ҳуқуқӣ мегирад.
Пештар Вазорати корҳои дохилӣ эълон карда буд, ки афроде, ки ба назди фолбинҳо мераванд, барои суҳбат ба идораҳои милиса даъват шуда, маълумоташон ба қайд гирифта мешавад.
Дар чанд соли охир ҳукумати Тоҷикистон маъракаи густурдаи мубориза бо фолбинӣ ва ҷодугариро роҳандозӣ кардааст. Тибқи гузоришҳои Вазорати корҳои дохилии кишвар, дар ин давра даҳҳо нафар бо иттиҳоми машғул шудан ба фолбинӣ ва фаъолияти марбут ба ҷодугарӣ боздошт шудаанд. Мақомот мегӯянд, ин афрод бо истифода аз эътиқод ва боварии мардум фаъолият мекарданд ва амали онҳо нақзи қонун маҳсуб меёбад.
Вазорати корҳои дохилӣ борҳо тавассути изҳорот ва хабарҳои расмӣ аз шаҳрвандон даъват кардааст, ки ба чунин шахсон муроҷиат накунанд ва дар сурати ошкор шудани чунин ҳолатҳо, ба мақомоти дахлдор хабар диҳанд. Ба гуфтаи мақомот, ин маърака ҳамчун бахше аз талошҳо барои коҳиши хурофотпарастӣ ва ҳифзи амнияти иҷтимоӣ роҳандозӣ шудааст.
