Шаби 8 ба 9-уми январ дар Вилояти Мухтори Куҳистони Бадахшон заминларза ба қайд гирифта шуд. Хадамоти геофизикии Академияи миллии илмҳои Тоҷикистон хабар дод, ки заминларза соати 02:14-и шаби 9-уми январ сабт шудааст.
Ба иттилои манбаъ, маркази заминларза дар масофаи 61 километр дуртар аз ноҳияи Мурғоб ҷойгир буда, қувваи он дар марказ 5,3 балл арзёбӣ шудааст.
Ҳамзамон бархе сокинони шаҳри Душанбе дар шабакаҳои иҷтимоӣ навиштаанд, ки ҷунбиши заминро эҳсос кардаанд. То ҳол дар бораи талафоти ҷонӣ ё хисороти моддӣ маълумоти расмӣ нашр нашудааст.
Тоҷикистон дар яке аз минтақаҳои зилзилахези қиъаи Осиё қарор дорад ва ҳамасола дар қаламрави кишвар даҳҳо заминларза ба қайд гирифта мешавад. Бар асари офатҳои табиӣ, аз ҷумла заминларза, ҳар сол ба иқтисод ва инфрасохтори кишвар хисороти молии калон ворид мегардад.
