Додситони шаҳри Бӯстон пас аз нашри навори занозанияш бо молики тарабхонаи “Парламент” дар шабакаҳои иҷтимоӣ аз вазифааш сабукдӯш шудааст.
Бино ба иттилои Радиои Озодӣ, ҳамакнун собиқ додситони шаҳри Бӯстон Абдуқаҳҳор Азизов бо фармони Додситонии кул 17-уми январи соли ҷорӣ аз вазифааш ронадаву умуман аз ҳаққи кор дар идораҳои додситонӣ маҳрум шудааст.
Азизов, ки моҳи январи соли 2024 додситони шаҳри Бӯстон таъйин шуда буд, бо ҳамкоронаш 19-уми январи соли ҷорӣ хайрухуш кардааст.
Гуфта мешавад, Абдуқаҳҳор Азизов бо молики тарабхонаи “Парламент” Парвиз Ашӯров дар охирҳои моҳи декабри соли гузашта занозанӣ карда будааст, аммо гузориш дар ин бора 16-уми январи соли ҷорӣ нашр шуд.
Шоҳидони ҳодиса гуфтаанд, ки муноқиша аз он ҷо сар зад, ки собиқ додситон ҳангоми бо дӯстонаш дар тарабхона ҳузур доштан, гӯё бо Парвиз Ашӯров ҷанҷол карда, ба сари ӯ даст бардоштааст ва дар ҷавоб гӯё Парвиз Ашӯров ва дигар пайвандонаш додситонро задаанд.
Ҳамчунин гуфта мешавад, ки барои ҷудо кардани ду тараф як корманди милиса, ки дар тарабхона будааст, ба ҳаво тир андохтаву як ҷияни ноболиғи Парвиз Ашӯров боздошт шудааст.
Абдуқаҳҳор Азизов, писари Абдуҷаббор Азизов ёвари собиқи президенти Тоҷикистон дар масъалаи кадрҳо, муовини аввали раиси Ҳизби ҳокими Халқии Демократӣ ва корманди баландмақоми парлумон ва Парвиз Ашӯров домоди собиқи Қоҳир Расулзода, сарвазири Тоҷикистон аст.
Назари ҷонибҳо то ҳол маълум нест, мақомоти расмии Тоҷикистон бо гузашти тақрибан як моҳ аз ин ҳодиса ҳанӯз ҳам онро шарҳ надодаанд.
Бояд гуфт, занозанӣ бо иштироки мансабдорон ва ё наздикони онҳо дар Тоҷикистон дар гузашта борҳо расонаӣ шуда буд, аммо мақомот натиҷаи парвандаҳои онҳоро расонаӣ намекард.
