Дар шаҳри Электростали вилояти Маскав як ҷавони 19-солаи зодаи Тоҷикистон бо иттиҳоми қатли як ҷавони 18-солаи рус боздошт шудааст.
Бар асоси маълумоти расонаҳои русӣ, ин ҳодиса дар пайи як муноқиша байни чанд донишҷӯи рус ва ин ҷавони зодаи Тоҷикистон дар дохили афтобус сар задааст. Гуфта мешавад, чанд донишҷӯ ҳангоми баргаштан ба хона дар дохили автобус бо овози баланд суҳбат мекарданд, ки ин боиси норозигии яке аз мусофирон — ҷавони 19-солаи зодаи Тоҷикистон — мегардад. Байни тарафҳо муноқишаи лафзӣ сар мезанад.
Дар истгоҳ ҳамаи иштирокчиёни даргирӣ аз автобус мефароянд ва дар ҳол ҷанҷоли лафзӣ ба задухӯрд табдил меёбад. “Вақте ки ҷавонон дубора ба автобус бармегаштанд, ҳамлавар ногаҳон кордро берун оварда, ба Иля П. се зарба — ба гардан ва қисми болоии бадан — мезанад.”
Расонаҳои русӣ бар асоси нақли шоҳидон навиштаанд, ки пас аз ин ҳодиса гумонбар фирор мекунад ва аммо мусофирон то расидани ёрии таъҷилӣ талош мекунанд хунравиро аз донишҷӯи захмишуда боздоранд. Табибон ҷабрдидаро фавран ба бемористон интиқол доданд, аммо ӯ дар бемористон даргузаштааст.
Пулиси Маскав пас аз ин ҳамла гумонбарро боздошт мекунад. Манобеи наздик ба тафтишот ба расонаҳо гуфтанд, ки нисбати ин ҷавони зодаи Тоҷикистон, ки ба наздикӣ шаҳрвандии Русияро ҳам гирифтааст, парвандаи ҷиноӣ бо моддаи 105-и Кодекси ҷиноятии Федератсияи Русия (Одамкушӣ) боз шудааст. Ва ҳоло ӯ дар боздошгоҳ аст ва тафтишоти қазия идома дорад.
Пулис гуфта, ки ба хотири ин ки гумонбар аллакай шиносномаи Русияро гирифтааст ва шаҳрванди ин кишвар ҳисоб мешавад, бинобар ин расман ба омори ҷиноятҳои муҳоҷирон дохил намешавад.
То ҳанӯз ному насаб ва ҳувияти ин зодаи Тоҷикистон ва инчунин назари худи ва наздиконаш дар бораи ҳодиса дастраси расонаҳо нагаштааст.
