Созмони Гузоришгарони Бидуни Марз (RSF) аз мақомоти Тоҷикистон бори дигар талаб кард, ки рӯзноманигори зиндонӣ ва модари ду кӯдаки хурдсол Рухшона Ҳакимоваро бе қайду шарт озод кунад.
Имрӯз, 5-уми феврал аз эълони ҳукми зиндони рӯзноманигор Рухшона Ҳакимова як сол гузашт. RSF, ки мақараш дар Фаронса аст, бо нашри изҳороте ин рӯзро “солгарди ғамангези эълони ҳукм алайҳи рӯзноманигори мустақил Рухшона Ҳакимова дар Тоҷикистон” номидааст.
Ин созмони ҳомии рӯзноманигорон ҳукми Рухшона Ҳакимоваро бо иттиҳоми хиёнат ба давлат “худсарона” хонда, онро шадидан маҳкум намуда, таъкид кардааст, ки “ягона гуноҳи Рухшона мусоҳиба дар бораи нуфуз ва таъсири Чин дар Тоҷикистон аст”.
Рӯзноманигор ва модари ду кӯдаки хурдсол Рухшона Ҳакимова 16-уми июли соли 2024 дар наздикии манзилаш дар Душанбе аз ҷониби мақомот бидуни ордер боздошт ва 12 соат бе дастрасӣ ба вакили дифоъ нигоҳ дошта шуда буд. Мақомот ҳангоми набудани Ҳакимова дар манзилаш кофтуков гузаронида, таҷҳизот, шиноснома ва кортҳои бонкии ӯро мусодира кардаанд. Ӯ ба хотири доштани фарзанди ширхор то замони содир шудани ҳукм дар ҳабси хонагӣ буд.
Дертар Додгоҳи олии Тоҷикистон 5-уми феврали соли гузашта пушти дарҳои баста Рухшона Ҳакимоваро бо иттиҳоми сохтаи хиёнат ба давлат ба 8 соли зиндон маҳкум кард.
Таъқиби ин рӯзноманигори тоҷикро ба таҳқиқоташ дар бораи нуфузи Чин дар Тоҷикистон ва чанд мусоҳибаҳо, аз ҷумла бо Саидҷаъфар Усмонзода, вакили собиқи парлумон ва амакаш Шокирҷон Ҳакимов, ҳуқуқшиноси шинохта, ки ҳоло ҳарду дар доираи парвандаи табадулот барои солҳои тӯлонӣ равонаи зиндон гаштаанд, рабт медиҳанд.
Гуфта мешавад, ҳоло дар зиндонҳои Тоҷикистон беш аз 10 хабарнигор бо иттиҳомоти сохта дар зиндонҳо адои ҳукм мекунанд. Саркӯби рӯзноманигорон боис гашта, ки Тоҷикистон дар шохиси ҷаҳонии озодии матбуоти RSF дар соли 2024 дар байни 180 кишвари ҷаҳон дар ҷои 155-ум қарор бигирад.
