Мақомоти амниятии ноҳияи Файзобод чанд падару модарро бо иттиҳоми тадриси фарзандонашон ҷарима бастанд.
Як манбаъ бо шарти зикр нашудани номаш рӯзи ҷумъа ба Azda.tv гуфт, ки намояндагони КДАМ дар ноҳияии Файзобод чанде аз волидайнро ба хотири таълими динӣ додани фарзандонашон ҷарима бастаанд.
Манбаъ мегӯяд, ин кор чанд вақт аст, ки маъмурони КДАМ ҳамроҳ бо чанд намояндаи дигар аз мақомоти ноҳия мактаб ба мактаб гашта, кӯдаконро мепурсанд, ки оё дар хона таълими динӣ мегиранд ё на.
“Аввал китоби Қоидаи Бағдодиро ба кӯдакон нишон медиҳанд ва мепурсанд, ки номи ин китобро кӣ донад ва ҳар ки хонда тавонад, ӯро ба Душанбе тамошо мебарем”.
Бино ба иттилои манбаъ, чанд кӯдаке, ки хонда тавонистааст, онҳоро пурсидаанд, ки чӣ гуна хонданро ёд гирифтанд ва омӯзгорашон кист.
Мақомот ба ҳамин восита 25 нафар волидайни кӯдаконро боздошт карда, ҳар як кадомро аз 5 то 7 ҳазор сомонӣ ҷарима бастаанд.
Манбаъ афзуд, ки ҳатто баъзе боздоштшудаҳо занҳои пиронсоли нодоре буданд, ки наберагонашон ҳамроҳашон мезистанд, онҳоро низ боздошт ва ҷарима карданд.
Аммо ба назари мунтақидон, мақсад аз ин ҷаримабандиҳо пешгирӣ аз ифротгароӣ нест, балки далели фасодзадагии ҳукуматест, ки кормандони қудратияш мехоҳанд бо зӯран ситонидани нони мардум аз даҳонашон, кисаи худро пур кунанд.
Дар асл табиист, ки модаркалон ба наберааш чизе меомӯзонад, вале бибиҳои деҳотии мо кадомашон аз Қоидаи Бағдодӣ болотар чизе ба наберагонашон таълим медиҳанд?
