Вазири адлияи Тоҷикистон аз ҷавоб додан ба суоли рӯзноманигорон дар бораи зиндонҳо худдорӣ кард.
Имрӯз, 12-уми феврал зимни нишасти матбуотии Вазорати адлияи Тоҷикистон хабарнигори Радиои Озодӣ аз Музаффар Ашуриён, вазири ин ниҳод дар мавриди рух додан ё надодани тирпарронӣ дар зиндони шаҳри Хуҷанд пурсид, аммо вазири адлияи кишвар аз посухи возеҳ фирор карду ҷавоби қонеъкунанде надод.
Баръакс, Ашуриён ба хабарнигор суол дод, ки “Шумо худатон чӣ хабар доред?” ва вақте посух мегирад, ки тирпарронӣ сурат гирифтааст, мегӯяд, ки “ин ҷиноят аст ва дар салоҳияти мо нест ва ба суолатон посух намедиҳам” ва ба гӯш кардани дигар суолҳо мегузарад.
Ин ҳам дар ҳолест, ки хабарнигор танҳо мехост бифаҳмад, ки ҳодисае рух додааст ё на.
Бояд гуфт, ин бори аввал нест, ки Музаффар Ашуриён аз додани посух ба суолҳои муҳим ба мисли вазъи зиндониёни сиёсӣ, шароити нигаҳдории зиндониён дар маҳбасҳои кишвар ва ғайра “мегурезад”. Аммо ба суолҳо дар бораи сабти аснод ва ғайра ҳамеша посухи равшан ва дақиқ медиҳад ва ҳамеша талош мекунад то нишасти матбуотиро, ки ҳамагӣ як бор дар шаш моҳ баргузор мешавад барвақтар ҷамбаст кунад.
Ёдовар мешавем, ки дар як тирпаронӣ дар Боздоштгоҳи шаҳри Хуҷанд дасти кам се зиндонӣ ва як нигаҳбон кушта шудаанд.
Гуфта мешавад, 31-уми январи соли ҷорӣ ҳашт маҳбус баъди паррондани як нигаҳбони Боздоштгоҳи шаҳри Хуҷанд бо нияти фирор вориди нуқтаи ҳоил шуданд, аммо нигаҳбонони дигар ба тарафи онҳо тир андохта, се маҳбусро мекушанд ва агар ин зиндониҳо аз нуқтаи ҳоил мегузаштанд, дигар як дарвозаи баромад буд ва метавонистанд гурезанд.
Дар ҳамин ҳол Муҳаммадиқболи Садриддин, мудири пойгоҳи “Isloh.net” дар саҳфаи фейсбукиаш рӯзи 2-уми феврал навиштааст: “Имрӯз як зиндонии кушташуда аз Рӯдакиро зери тадобири амниятӣ гӯронданд. Адади кушташудаҳоро то 15 ва маҷруҳин ҳам зиёданд.”
Ангезаи ҳамла дар Боздоштгоҳи Хуҷанд то ҳол маълум нест. Мақомоти Тоҷикистон ҳам ин ҳодисаро шарҳ надодаанд ва ин боиси тахмину оморҳои гуногун гаштааст.
