Додситони кулли кишвар иддао дорад, ки бо ҳамла аз хоки Афғонистон мехоҳанд муносибати Тоҷикистону Чинро вайрон кунанд.
13-уми феврали соли ҷорӣ, додситони кулли кишвар Ҳабибулло Воҳидзода дар ҳузури хабарнигорон даргироҳои ахир дар сарҳади Тоҷикистону Афғонистонро, ки охири соли 2025 дар ҳудуди ноҳияҳои Шамсиддин Шоҳин ва Дарвоз рух доданд, шарҳ дод.
Ба гуфтаи Воҳидзода, ин амалиёт кори дасти баъзе гурӯҳҳои ҷиноӣ буда, дар пайи он ду марзбони тоҷик ва панҷ шаҳрванди Чин кушта ва панҷ тани дигар захмӣ шудаанд.
“Шаҳрванди Чин ба роҳсозӣ машғул аст, куштори ҳамон ба кӣ даркор? Ин аз он шаҳодат медиҳад, ки баъзе шаҳрвандон ва гурӯҳҳои ҷинояткор ҳастанд, ки тинҷию оромиро намехоҳанд ё мехоҳанд муносибати моро бо давлати Чин вайрон кунанд. Вагарна роҳсоз чаро дар вақти корӣ паронда мешавад, махсусан, мардуми Чин?” – мегӯяд Воҳидзода.
Аммо додситон аз гурӯҳе ном набурда, танҳо гуфт, ки “ин куштор аз ҷониби шаҳрвандони Тоҷикистон амалӣ карда нашудааст”.
Ҳамчунин ӯ илова кард, ки дар робита ба ин ҳодисаҳо бо иттиҳоми куштор парвандаҳои ҷиноятӣ оғоз шуда, тафтишот идома дорад ва ҳамаи ҳолатҳо дар доираи парвандаҳои ҷиноӣ тафтиш ва муайян карда мешаванд.
Аммо суоли асосӣ инҷост, ки баъзе гурӯҳҳои ҷиноие ки Воҳидзода мегӯяд кадом гурӯҳ аст ва чаро мехоҳанд муносибати Тоҷикистону Чинро вайрон кунанд?
Пештар Хайриддин Усмонзода, раҳбари Маркази тадқиқоти стратегӣ (МТС)-и Тоҷикистон, дар нишасти матбуотии рӯзи 9-уми феврал низ гуфта буд, ки яке аз омилҳои аслии даргириҳои охир дар сарҳад гурӯҳҳое ҳастанд, ки ба ҳукумати феълии Афғонистон итоат намекунанд. Ӯ низ аз гурӯҳе ном набурда буд. Ҳамчунин, Сироҷиддин Муҳриддин, вазири корҳои хориҷии Тоҷикистон бе додани ҷузъиёт гуфта буд, ки барои пешгирии низоъ дар сарҳад мақомоти қудратии ду кишвар ҳамкорӣ доранд.
